Հայոց Ցեղասպանութեան թանգարան-հիմնարկէն կը տեղեկանանք, որ եգիպտահայ Երվանդ Կանիմեանը օրերս Հայոց ցեղասպանութեան թանգարան-հիմնարկին յանձնած է իր հօր վերարկուն: Հայրը՝ Էֆլաթոն Կանիմեան այս վերարկուն կրած է Մարաշէն մինչեւ Եգիպտոս գաղթի ճանապարհին:
Էֆլաթոն Կանիմյանը մեծ ընտանիքի՝ Յովհաննէս Կանիմեանի եւ Մարիամ Չալեանի եօթերորդ զաւակն էր, ծնած էր Մարաշ՝ 16 Օգոստոս 1900-ին:
1920-ի սկիզբին, երբ ֆրանսական զօրքերը կը լքէին Մարաշը Էֆլաթոն Կանիմեանը գաղտնի միանալով անոնց՝ հեռացած է հայրէնի քաղաքէն: Ցուրտ եղանակային պայմաններուն դիմակայելու համար՝ Մարիամը՝ Էֆլաթոնի մայրը, իրենց տան կարպետը վերաձեւած է վերարկուի եւ տուած որդիին: Ֆրանսական զօրքերու հեռանալէն ետք քեմալականները մտած էին Մարաշ, հայերը դիած էին ինքնապաշտպանութեան եւ շուրջ 20 օր կենաց ու մահուան կռիւ տուած են: Երիտասարդ Էֆլաթոնը փրկուած է վերահաս մահէն՝ նախապէս փախուստի դիմելով: Էֆլաթոն Կանիմեանը Եգիպտոս գաղթելէն ետք ամուսնացած է Ազնիւ Օրջանեանի հետ եւ ունեցած հինգ երեխայ: Էֆլաթոն Կանիմեանը մահացած է 1985-ին:
Այս մասին յաւելեալ տեղեկութիւնները «Արեւելք»ի՝ արեւելահայերէն բաժնին մէջ: