ISIS Ահաբեկչական խմբաւորումը հրկիզած Թալ Ապեատի Հայ Առաքելական «Սուրբ Խաչ» եկեղեցին եւ պղծած մկրտութեան աւազանը: Այս մասին «Արեւելք» տեղեկութիւններ ստացաւ ներկայիս Թալ Ապեատի մէջ ապրող հայրենակիցէ մը, որ ապահովական պատճառներով նախընտսրեց իր անունը չյիշատակել: Մեր աղբիւրը նաեւ նշեց, որ այսօր շրջանին մէջ կ'ապրին 10 հայ ընտանիքներ:«Արեւելք»ի աղբիւրը նաեւ նշեց, որ «Իսլամական պետութեան» ահաբեկիչները իմանալէ ետք, որ եկեղեցիին շրջափակը գտնուող ծառերը տնկուած են հայերու ձեռամբ արմատախիլ ըրած են զանոնք: Մեր աղբիւրը նշեց, որ «Իսլամական պետութեան» զինեալներ եկեղեցիի կից գտնուող սենեակները վերածած են բանտերու, ուր կը կարծուի, որ կատարած են գլխատումներ: Ներկայ պահուն շրջանը կը գտնուի քրտական Բէշմարքայի եւ PKK–ի զինեալներու տիրապետութեան տակ, որոնք թէժ մարտեր մղելէ ետք յաջողած են վտարել ահաբեկիչները շրջանէն: «Արեւելք»ի աղբիւրը ըսաւ, որ քիւրտերը երեւելի օգնութիւն տուած են տեղի հայերուն եւ օժանդակած, որ «Սուրբ Խաչ» եկեղեցին մաքրուի: Մեր հայրենակիցները ներկայիս դրամահաւաք կը կատարեն վերանորոգելու համար եկեղեցին: Նշենք, որ մեր աղբիւրին համաձայն Թալ Ապեատի դէմ «Իսլամական պետութեան» վտանգը առկայ է այնքան ատեն, որ այդ ահաբեկիչները կը գտնուին շրջանին կից գտնուող եւ իրենց գլխաւոր կեդրոնատեղին համարուող Ռաքքա քաղաքին մէջ: Աղբիւրը աւարտին նշեց, որ ռուսական ուժեր անցնող օրերուն ծանր հարուածներ կը կատարեն Ռաքքայի մէջ գտնուող «Իսլամական պետութեան» կեդրոնատեղիներուն դէմ: Նշենք, որ Թալ Ապեատէն այսօր «Արեւելք»ի ստացած տեսանիւթը կարելի է դիտել սեղմելով ՝ այստեղ: