19.09c
Երեվան
շբթ, ապր 20
«Արեւելք»ի նախկին խմբագիր Սագօ Արեան կը գրէ ՝
Կարճ դադարէ մը ետք կը վերադառնանք Լիբանանի զարգացումներուն. Այս գիշեր կարեւոր իրադարձութիւն գրանցուած է Պէյրութի մէջ, երբ «Հըզպալլա»ի եւ «Ամալ» շարժումի (Երկու Շիիթ գլխաւոր ուժերն են) հանդիպած են հրաժարեալ վարչապետ Սաատ Հարիրիին հետ, եւ հանդիպման աւարտին կողմերը հասած են նոր համաձայնութեան։ Ըստ այդ համաձայնութեան յառաջիկայ օրերուն տեղի ունենալիք պարտադիր խորհրդակցութեան ընթացքին երկրի պատգամաւորներու մեծամասնութիւնը, նախկին նախարար Մոհամմատ Սաֆատիի (բնականաբար սիւննի համայնքէն) անունը պիտի տան, որպէս վարչապետի թեկնածու։ Անշուշտ այս համաձայնութեան մէջ կայ նաեւ նախագահ Աունի հիմնադրած «Ազգային ազատ հոսանք» կուսակցութիւնը եւ եթէ տարածուած տեղեկութիւնը ճիշդ ըլլայ, ապա Լիբանան շատ մօտիկ ապագային պիտի ունենայ նոր վարչապետ։
Անձնապէս շատ տեղեկութիւններ կամ տուեալներ չունիմ Սաֆատիի մասին, բայց լաւ կը յիշեմ, որ ան վարչապետ Ռաֆիք Հարիրիի ու ներկայիս գործող վարչապետ Սաատ Հարիրիի գործակիցներէն է. Գործարար մարդ է եւ անոր անունը չէ շօշափուած կաշառակերութեան թղթածրարներու մէջ։
Վստահ եմ, որ այս տարածքի կարգ մը ընկերներ, պիտի ուզեն յաւելումներ կատարել իմ ներկայացուցած տուեալներուն վրայ ու լաւ կ՚ընեն, բայց ամենակարեւորն այն է, որ եթէ Մոհամմատ Սաֆատին երկրի նոր վարչապետ նշանակուի, ապա Լիբանան մեծ առումով հեռացած կ՚ըլլայ անորոշութեան եւ վտանգալից կացութեան բաւական սեղմուած օղակներէն։
