image
Հրատապ լուրեր:

Ազգային Տոլման. Խաժակ Այնթէպլեան

Ազգային Տոլման. Խաժակ  Այնթէպլեան

Կիրակի օրով կ'արժէ՞ արդեօք տոլմայի մը համար այսքան իրարանցում ստեղծել...

    Այ Եունեսքօ ճան , այ ընկեր ճան , եթէ քիչ մը պատմութիւն կարդացած ըլլայիր , պիտի տեսնէիր թէ ազրպէյճանը գոյութիւն իսկ չունէր երբ Հայ ժողովուրդը տեսակ տեսակ տոլմա կ՚ուտէր : Հիմա պնակ մը տոլմայի համար դուն քեզ խայտարակ ըրիր ,մեզի ալ ազգային նոր խնդիր մը ստեղծեցիր ...

Պիտի առաջարկէի այս կիրակի մանղալը մէկ կողմ դնել , եունէսքոյի անարդար որոշման դէմ ձայն բարձրացնել եւ ազգովին տոլմա ուտել : Սակայն երբ որ խորը մտածեցի, քանի մը անպատեհութիւն նկատեցի .- Նախ եւ առաջ մտածեցի թէ կիրակի օրով դժուար պիտի ըլլայ սփիւռքի մէջ այսպէս բողոք մը կազմակերպել եւ մանղալը տոլմայով փոխարինել : Յետոյ ինչպէ՞ս տոլման կոկորդնէս պիտի իջնէ երբ անիկա այլեւս պաշտօնապէս ազերիական կերակուրի տեսակ մըն է : Այս մէկը սփիւռքի մէջ կրնայ լուրջ խնդիրներ ստեղծել ու տոլմա ուտողը յետ այսու ազգային դաւաճան համարել ... Սակայն աւելի խորը երբ մտածեցի միտքս բաւական հանցստացուցի , որովհետեւ նկատեցի թէ տոլմայի հարցը մեր ազգային բոլոր խնդիրներուն կը նմանի եւ մեր ժողովուրդը քանի տեսակ որ հայ ունի , այնքան տեսակ տոլմա ունի:

Սխալ է՞ ըսածս , հիմա եթէ երթամ մօրս խնդրեմ տոլմա մը եփէ , երկու քիլօ դդումը արագ մը կը փորէ , բրինձով միսի լիցքին երկու դգալ «պիպէրի թթու» կ՚աւելցնէ դդումին մէջ կը թխմէ ու «թէնճէրէն կը քփըրթացնէ» ... Մէկ ժամ յետոյ ճէպէլմուսական տոլման արդէն պատրաստ է : Հալէպցի բարեկամս նոյն դդումով տոլման եփած ատեն , հետը ոսկոր կը խաշէ մէջն ալ առատ կծու համեմ կը դնէ: Չեմ գիտեր պարսկահայը իր տոլման կաղամբո՞վ թէ դդումով կը պատրաստէ բայց վստահ եմ որ մէջը առատ բրինձ կը դնէ. իսկ մշեցին իրենց տոլման մեղմ կրակով կամաց կամաց կը խաշէ մէջն ալ առատ սխտոր կը լեցնէ ....

Հայաստանցին տոլման ընդհանրապէս խաղողի տերեւով կը պատրաստէ , մէջի միսն ալ բրինձին համեմատ շատ աւելի առատ կը լեցնէ : Եթէ եունէսքոյին ուզածը այս տոլման է , մենք արեւմտահայերս ինչո՞ւ այսքան իրար անցած ենք ... Մենք խաղողի տերեւովին «սարմա» կ՚ըսենք ու արեւելահայ տոլմային համեմատած , շատ աւելի բարակ կը փաթթենք եւ սովորաբար ոչ թէ միսով այլ զայն ձէթով կը պատրաստենք....

Այսպէս' մեր ազգին մէջ քանի տեսակ որ հայ կայ այնքան տեսակ տոլմա կայ : Ի՞նչ կը կարծէք, այս կիրակի արժէ՞ արդեօք փորձ մը ընել եւ եունէսքոյին դէմ որպէս բողոք , տոլման սարման միացնել եւ ազգային նոր տոլմա մը ստեղծել .... Գիտեմ գիտեմ... Մեր ազգային բնաւորութեամբ շատ դժուար է այսպէս բան մը յաջողցնել ... Այնքան ատեն որ մեր սարման ապահով է քիթերնիս ի՞նչու Հայաստանեան տոլմային մէջ մտցնել...

 Խաժակ Այնթէպլեան