Ֆրանսիայում օրեր առաջ կորոնավիրուսից մահացած քաղաքական գործիչ Պատրիկ Դևեջյանի հուղարկավորությունը կայացել է երեկ՝ Ֆրանսիայի Մարե թաղամասում գտնվող Սուրբ Խաչ հայ կաթոլիկ եկեղեցում: Մասնակցել են կինը՝ Սոֆի Դևեջյանը, չորս որդիները և շատ սահմանափակ թվով մարդիկ: Այս մասին տեղեկանում ենք Փարիզից:
Պատրիկ Դևեջյանը 75 տարեկան էր: Նրա մահվան կապակցությամբ ցավակցություն են հայտնել ինչպես հայ, այնպես էլ ֆրանսիացի քաղաքական գործիչները՝ նկատելով, որ Դևեջյանը հարուստ քաղաքական գործունեություն է ունեցել Ֆրանսիայում, լինելով նախարար, Ֆրանսիայի Ազգային ժողովի անդամ, քաղաքապետ, իսկ 2007 թվականից ի վեր Օ-դե-Սեն դեպարտամենտի Գլխավոր խորհրդի նախագահն էր: 2014 թվականին Հայաստանի Հանրապետության Անկախության տոնի առթիվ, ինչպես նաև Հայաստանի Հանրապետության և Ֆրանսիայի Հանրապետության միջև բարեկամական կապերի ամրապնդման գործում ներդրած նշանակալի ավանդի համար պարգևատրվել է Պատվո շքանշանով:
Հատկանշական է, որ Պատրիկ Դևեջյանը 1955-1959 թվականներին սովորել է Սամուէլ Մուրատյան վարժարանում: Նրա իսկական անունը Գարեգին է: Սակայն այդ տարիների ֆրանսիական օրենքի համաձայն, պետք է ունենար նաև ֆրանսիական անուն, և նա ընտրել էր Պատրիկը, որով էլ ճանաչում էին նրան: Հուղարկավորության առթիվ հիշվել է նաև Գարեգին Դևեջյանի հայկական դպրոցում ստացած կրթությունը:
Պատրիկ-Գարեգին Դևեջյանը՝ Սոֆի Դևեջյանի հետ