Գերմանիոյ վարչապետ Անկելա Մէրքէլը հաստատած է, որ Գերմանիոյ խորհրդարանի (Պունտեսթագ) յաջորդ ընտրութիւններէն յետոյ, որոնք տեղի պիտի ունենան 2021-ին, այլեւս մտադիր չէ քաղաքականութեամբ զբաղիլ: Այս մասին Մերքելը յայտարարած է երեքշաբթի օր:
«Այո, այլեւս չեմ ցանկանար գործօն քաղաքական պաշտօններ վարել: Ի հարկէ, ես կը շարունակեմ քաղաքական մարդ ըլլալ, սակայն գործօն քաղաքականութեամբ զբաղելու չեմ պատրաստուիր»,- ըսած է Մէրքէլը:
Նշենք որ 2018-ի վերջերը Մէրքէլը հեռացած է Քրիստոնեայ-դեմոկրատական միութեան նախագահի պաշտօնէն, սակայն շարունակած է վարել վարչապետի պաշտօնը: Ըստ Մէրքէլի ան պատրաստ է մինչեւ վերջ, այսինքն՝ մինչեւ 2021 աշխատիլ որպէս Վարչապետ իր չորրորդ ժամկէտով:
Մէրքէլ ցանկացած է, որ 50 տարիներ ետք, պատմութիւնը յիշէ որ ինք ջանասիրաբար կատարած է իր պարտականութիւնները:
Լուրը՝ ТАСС գործակալութիւն՝ յղում կատարելով գերմանական աղբիւրին: