19.09c
Երեվան
շբթ, ապր 20
Թուրքիոյ Պոլիս քաղաքի Պաքըրքէոյ շրջանի Զէյինլիք թաղամասին մէջ գտնուող հայկական Ծնունդ Սբ. Աստուածածին եկեղեցւոյ պատերուն վրայ յայտնուած են ներկանիւթերով գրութիւններ: Այս մասին կը հաղորդէ Ermenihaber.am-ը՝ նշելով, թէ իրենց լուսանկարչական մեքենան լուսանկարած է եկեղեցւոյ պատերուն վրայ յայտնուած գրութիւնները:
Ուշագրաւ է, որ եկեղեցւոյ պատերուն կ՝երեւի «OHB» ստորագրութիւնը. այսպէս կը կոչուի Պոլսոյ կրաֆիթի ընող ամենաաշխոյժ խումբերէն մէկը:
Քրիստոնեաներու սրբավայրի հանդէպ վանտալութեան դրսեւորումը եւ հաւատացեալներու զգացմունքներուն նկատմամբ անյարգալից վերաբերմունքը Թուրքիոյ մէջ նոր երեւոյթ չէ:
Տարիներ առաջ, նոյնպէս, այս եկեղեցւոյ պատերը պղծուած էին: Թէեւ 2018-ին այդ գրութիւնները կապոյտ ներկով քօղարկուած էին, այնուամենայնիւ, այսօր պատերը կրկին լի են գրութիւններով` անվայել, տարաբնոյթ, անհասկնալի բովանդակութեամբ:
Բացի այդ, նախորդ տարուան Ապրիլին, Պոլսոյ Քատըքէոյ վարչական շրջանին մէջ գտնուող «Սուրբ Թագաւոր» հայկական եկեղեցին յայտնուած էր ազգայնականներու թիրախին: Անյայտ անձ մը, եկեղեցւոյ մուտքին մօտ աղբաման դատարկած էր, իսկ շէնքի պատին գրած էր՝ «էրզրումցի. այս հայրենիքը մերն է»:
Յիշեցնենք, որ Պոլսոյ Պաքըրքէոյ շրջանի Ծնունդ Սուրբ Աստուածածին եկեղեցին կառուցուած է 1844-ին, սուլթանական Թուրքիոյ արքունի վառօդապետ Յովհաննէս Տատեանի կողմէ` Պարութհանէի (Վառօդարան) եւ Զէյթինպուրնուի դարբնոցներու հայ բանուորներուն խնդրանքով։
Կայսերական հրամանով՝ եկեղեցին վերանորոգուած է 1847-ին, իսկ վերջին վերանորոգման աշխատանքները կատարուած են 1999-ին, որմէ ետք եկեղեցին վերաբացուած է Ամէն. Տ. Մեսրոպ Բ. Պատրիարքի օծմամբ:
Սուրբ Աստուածածին եկեղեցւոյ բակին մէջ թաղուած են Օսմանեան պետութեան մէջ լուրջ հեղինակութիւն ունեցած շարք մը անձեր, որոնք իրենց նպաստը ունեցած են Պոլսահայ համայնքային կեանքին մէջ:
Եկեղեցւոյ եւ դպրատան հիմնադիր Յովհաննէս Տատեան վախճանած է 1869-ին։
Նշենք, որ Յովհաննէս Տատեանը Օսմանեան կայսրութեան ժամանակաշրջանին հիմնած է Պէյքոզի թուղթի գործարանը, Էյուպի, Հերեքէյի եւ Իզմիթի կերպասեղէնի գործարանը եւ Զէյթինպուրնուի դարբնոցը։
.JPG)
