Թուրքիոյ հարաւային Մերսին նահանգի ափերուն մօտ գաղթականներ տեղափոխող լաստանաւ խորտակուած է, կը տեղեկացնէ թրքական «Սիոզճու» պարբերականը:
Յայտնի է, որ Թուրքիա տեղափոխուող գաղթականները Սուրիոյ քաղաքացիներ են: Լաստանաւը Մերսինի Էրտէմլի շրջանի ափամերձ տարածքին մէջ անյայտ պատճառներով սկսած է ջուրի տակ անցնիլ:
Մերսինի առափնեայ անվտանգութեան ծառայութեան աշխատակիցները նախ յաջողած են ջուրէն հանել լաստանաւի մէջ գտնուած 12 սուրիացիներէն 11-ը, ժամեր անց գտնուած է նաեւ լաստանաւի վերջին ուղեւորը: Բոլորը տեղափոխուած են տեղի հիւանդանոցներ:
Շաբաթներ առաջ Թուրքիոյ Իզմիր նահանգի Քարապուրուն շրջանի ափերուն մօտ գաղթականներ տեղափոխող լաստանաւ խորտակուած էր, այն կը տեղափոխէր հիմնական իրաքցի անօրինական գաղթականներ: Փրկարարները յաջողած էին ջուրէն դուրս բերել շուրջ 40 գաղթականներէն միայն 9-ի դին: