Գանատայի մէջ իր մահկանացուն կնքած է հալէպահայ անուանի ՀՄԸՄ-ական մարզիկ Սերոբ Մերթխանեանը։
Այս մասին տեղեկութիւն ստացանք հանգուցեալի հարազատներէն։
Հանգուցեալը երկար տարիներ հանդէս եկած է ՀՄԸՄ-ի Հալէպի ֆութպոլի խումբին շապիկով՝ դառնալով խումբի լաւագոյն խաղացողներէն մին։
Ան ծնած էր 1946 թուականին եւ փոքր տարիքէն անդամակցած է ՀՄԸՄ-ի շարքերուն որպէս գայլիկ։
Աւելի ուշ Ֆութպոլի հանդէպ իւրայատուկ սէր ունեցող Սերոբը միութենական իր կեանքը սկսած է սկաուտական Արամազդ խումբին մէջ, որմէ ետք փոխանցուած է Համազասպ խումբ: 1965-ին առաջին անգամ ըլլալով ան իր մասնակցութիւնը կը բերէ ՀՄԸՄ-ի ներկայացուցչական կազմին, ուր որպէս խաղացող ծառայած է տասը տարիներ եւ որոշ շրջան մը ստանձնած խմբապետի պաշտօն: 1972-1973 թուականներուն հրաւիրուած է Սուրիոյ հաւաքական, ինչպէս նաեւ զինուորական շրջանին մաս կազմած է Սուրիոյ բանակի ֆութպոլի խումբին: Ութը տարիներ մաս կազմած է Հալէպի ֆութպոլի հաւաքականին: 2003-ին Սերոբ Մերթխանեան արժանացած է ՀՄԸՄ-ի Սուրիոյ Շրջանային վարչութեան ծառայութեան շքանշանին:
Հանգուցեալին յուղարկաւորութիւնն ու թաղման կարգը պիտի կատարուին յառաջիկայ օրերուն Գանատայի Լավալ քաղաքին մէջ։
Այս տխուր աթիւ «Արեւելք» կը ցաւակցի հանգուցեալի հարազատներուն եւ յատկապէս անոր հարազատ՝ Տիկն. Մարի Մերթխանեան-Եարալեանին։