Մի խումբ սիրիահայեր դիմել են «Արեւելքին»՝ մտահոգված պատմելով երեկ երեկոյան Օպերայի բակում տեղի ունեցած միջադեպի մասին, որի արդյունքում սիրիահայ ութամյա մի փոքրիկ բռնության է ենթարկվել:
Բակում տեղադրված փչովի բատուտում խաղալու ժամանակ մի երեխա մայրիկին բողոքել է, որ ներսում մի փոքրիկ տղա հրել է իրեն: Մայրը, լսելով աղջկա բողոքը, մտել է բատուտի մեջ եւ ծեծել խաղի ժամանակ իր աղջկան ձեռքով հրած տղային: Ծեծին ականատես են եղել խաղավայրի աշխատողները եւ շուրջը հավաքված մարդիկ, սակայն, ինչպես պատմում են դեպքը ներկայացնող սիրիահայերը, ոչ ոք չի միջամտել: Ավելին, երբ երեխայի ծնողները ոստիկան են կանչել, որոշ մարդիկ դեպքի վայրից արագ հեռացրել են բռնություն կիրառած կնոջը:
«Արեւելքին» դիմած եւ վրդովված սիրիահայերը պատմում են, որ երեխան Երեւանում հաստատված հայտնի բժիշկներից մեկի որդին է, որը խաղի ժամանակ թեթեւակի հրել է նույն բատուտում խաղացող աղջկան:
Նրանք տեղեկացնում են նաեւ, որ ոստիկանները դեպքի վայր են ժամանել բավական ուշացումով, իսկ ժամանելուց հետո էլ ոչինչ չեն կարողացել անել, քանի որ երեխային ծեծած կինը արագ հեռացել է:
«Արեւելքի» հետ զրույցում երեխայի հայրը՝ Երեւանում հաստատված սիրիահայ ատամնաբույժ Հ.Գ.-ն, ասաց, որ անծանոթ կինն իր երեխային կոպտորեն ծեծել է, իրենք հազիվ են հասել եւ նրա ձեռքից ազատել ութամյա տղային:
«Մենք պատերազմից եկանք հայրենիք, այստեղ ապրում ենք, աշխատում, երեխաներն այստեղ դպրոց եւ մանկապարտեզ են հաճախում, բայց երբեք չէինք մտածի, որ հայրենիքում այսպիսի միջադեպի մասնակից կլինենք: Եթե այդ կինը փախած չլիներ, մենք ուղղակի դատի կտայինք նրան: Այդ պահին մեզ երեխան էր հետաքրքրում եւ մինչ երեխային հանգստացնում էինք, նա փախավ, հետո էլ չկարողացանք գտնել: Ապշել էինք, թե այդքան երիտասարդ կինը ինչպե՛ս է դաժանորեն խփում փոքրիկին: Ուզում եմ, որ դեպքի ականատեսները այս ամենը կարդալով՝ մի քիչ մտածեն տեղի ունեցածի մասին: Իսկ խաղավայրի պատասխանատուներն էլ, այդքան թանկ գներով խաղավայրը շահագործելուց առաջ նախ մտածեն ապահովության եւ կարգ ու կանոնի մասին»,-«Արեւելքին» հայտնեց սիրիահայ բժիշկը, որը կարծում է, թե դեռ ուշ չէ, եւ իրավապահները կարո՛ղ են այս դեպքի առնչությամբ համապատասխան քայլեր ձեռնարկել: