Օրերս Ֆէյսպուքի էջերուն բուռն կերպով կը քննարկուի Եգիպտոսի նկատմամբ վիրաւորական պահուածք դրսեւորելու մէջ մեղադրուող լիբանանցի Մունայի հարցը:
«Ալ Արապիա» լրատուական կայանին հետ զրոյցի ժամանակ Մունայի հայրը՝ Ալի պատմած է, որ իր դուստրը անսահման մեծ սէր կը տածէ Եգիպտոսի նկատմամբ: Ան երկրորդ անգամ է, որ կ'այցելէր Գահիրէն, եւ իր կողմէ տեսագրուած երիզը, որուն պատճառով ալ 8 տարուան ազատազրկման դատապարտուեցաւ եգիպտական իշխանութիւններու կողմէ, երբեք չի բխիր անոր էութենէն, որովհետեւ Մունա շատ հանդարտ եւ հանդուրժողականութեամբ օժտուած աղջիկ է, սակայն միաժամանակ կը տառապի առողջական ծանր եւ բարդ խնդիրներէ:
Մունայի հայրը նշած է նաեւ, որ իր դուստրը 12 տարի առաջ ուղեղի բարդ վիրահատութեան ենթարկուած է, որուն հետեւանքով ալ յաճախ դժուար պահեր կ'ապրի եւ ջղային վիճակի կը մատնուի, որ կրնայ մէկ շաբաթէն 10 օր տեւել: Այդ օրերու ընթացքին Մունա անկարող կ'ըլլայ տիրապետել ինք իր արարքներուն, եւ չի գիտակցիր, թէ ինչ կ'ընէ կամ կը խօսի: