18.09c
Երեվան
ուրբ, ապր 19
Կիպրոսի Հանրապետութեան ներկայացուցիչներու պալատի նախագահ Տեմեթրիս Սիլուրիսի գլխաւորած պատուիրակութիւնը 22 մայիսին այցելեց Ծիծեռնակաբերդի յուշահամալիր` յարգանքի տուրք մատուցելու Հայոց Ցեղասպանութեան զոհերու յիշատակին:
ՀՀ ազգային ժողովի փոխնախագահ Էտուարտ Շարմազանովի ուղեկցութեամբ Կիպրոսի ներկայացուցիչները ծաղկեպսակ դրին Հայոց Ցեղասպանութեան զոհերու յիշատակը յաւերժացնող յուշարձանին եւ ծաղիկներ խոնարհեցին անմար կրակի մօտ:
Հայոց Ցեղասպանութեան թանգարան-հիմնարկի տնօրէնի պաշտօնակատար Գէորգ Վարդանեան ներկայացուց յուշահամալիրի կառուցման պատմութիւնը եւ յուշակոթողի խորհրդանշական իմաստը:
Կիպրոսի Հանրապետութեան ներկայացուցիչներու պալատի նախագահ Տեմեթրիս Սիլուրիսը նշեց, որ Հայոց Ցեղասպանութեան ճանաչումը Թուրքիոյ եւ ողջ աշխարհի կողմէ, ինչպէս եւ իւրաքանչիւր ցեղասպանութեան ճանաչումը պատմական նշանակութիւն ունի` ապագային նման դէպքերէն խուսափելու համար:
«Սա է հայերու պայքարը: Մենք միշտ հայերու կողքին պիտի ըլլանք ոչ միայն որպէս բարեկամներ եւ եղբայրներ, այլեւ որպէս պետութիւն: Ատիկա պարտաւորութիւն մըն է ոչ միայն հայերու նկատմամբ, այլ ողջ մարդկութեան, որպէսզի երբեք ցեղասպանութիւններ չկրկնուին»,- ըսած է Սիլուրիս:
Կիպրոսի ներկայացուցիչները շրջայց կատարեցին նաեւ Հայոց Ցեղասպանութեան թանգարանին մէջ եւ ծանօթացան Ցեղասպանութեան մասին վկայող նիւթերուն: Վերջաւորութեան պատուիրակութեան անունէն գրառում կատարուեցաւ.
«Մենք կրկին տեսանք հայ ժողովուրդի տառապանքները բարբարոսութեան եւ ատելութեան մէջ. Մենք կ՛ըսենք` այլեւս երբեք»:
Կիպրոսը Հայոց Ցեղասպանութիւնը ճանչցած ու դատապարտած առաջին պետութիւններէն է: Ան բանաձեւեր ունի 1975, 1982, 1990 թուականներուն, ինչպէս նաեւ այն առաջին պետութիւնն է, որը բարձրացուցած է Հայոց Ցեղասպանութեան հարցը ՄԱԿ-ի Գլխաւոր Ասամպլէային: Կիպրոսը ունի նաեւ Հայոց Ցեղասպանութեան ժխտումը քրէականացնող օրէնք` ընդունուած 2 ապրիլ 2015-ին:
