«Հայ-լիբանանեան գործակցութիւնը աւելի զարգանալու եւ աւելի արդիւնաւէտ դառնալու նպատակ ունի: Այդ նպատակով երկու կողմերն ալ աշխատանք կը տանին», այս մասին յայտարարեց Լիբանանի զբօսաշրջութեան նախարար Աւետիս Կիտանեան երէկ լրագրողներու հետ զրոյցի ընթացքին:
Անոր համաձայն, զբօսաշրջութեան բնագաւառին մէջ արդիւնաւէտ գործակցութիւն արդէն իսկ գոյութիւն ունի, իսկ ինչ կը վերաբերի արդիւնաբերութեան եւ տնտեսութեան բնագաւառներուն մէջ գործակցութեան, անոնք պէտք է աւելի արդիւնաւէտ դառնան:
«Հայաստանի եւ Լիբանանի նախագահներու հանդիպումը առիթ ստեղծեց գործնականացնելու նախապէս ստորագրուած համաձայնագիրները: Կը կարծեմ` Հայաստանի վարչապետի` 12 մարտին Լիբանան այցելութիւնը աւելի գործնական քայլերու վրայ կը դնէ համաձայնութիւնները: Հայաստանի մէջ արդէն իսկ մեծ ներդրումներ կան լիբանանեան ընկերութիւններու կողմէ: Այսօր կը փորձենք նաեւ հակառակը ընել: Կ՛ենթադրեմ, որ Լիբանանի կառավարութեան եւ խորհրդարանին մէջ նախարարներու եւ պատգամաւորներու ներկայութիւնը պէտք է օգտակար ըլլայ», ըսաւ ան: