Թուրքիոյ նախագահ Էրտողանը ներկայ չէ եղած աշխարհի 7 լաւագոյն լուսանկարիչներէն մէկը համարուող պոլսահայ լուսանկարիչ Արա Կիւլէրի պատուին կազմակերպուած միջոցառման, որուն հրաւիրուած եղած է, կը գրէ թրքական haberler.com կայքը:
Պատասխանելով լրագրողներուն՝ նախագահի չներկայանալու մասին հարցին, Կիւլէր նշած է, որ ամէն սպասած է անոր:
«Կը կարծէի՝ կու գայ», - ըսած է Կիւլէր եւ պատմած Էրտողանի հետ ծանօթութեան ու համագործակցութեան մասին:
«Տեղ մը գացած էինք, այնտեղէն բաներ մը պիտի գնէի, այդտեղ մտերմացանք, յետոյ գացի անոր տուն, լուսանկարեցի իրեն եւ ընտանիքին: Իմ ժամանակաշրջանիս քանի նախագահ եկեր-անցեր է, երեւի 20 կամ 30, բայց ոչ ոք ասոնց (ԱՄՆ-ի-խմբգ.) դէմ դուրս չեկաւ, ինչպէս Էրտողանը, ես այս առումով կը հաւնիմ Էրտողանը», - նշած է Կիւլէր:
Յիշեցնենք, որ Պոլսոյ Պէյօղլու թաղամասի Թոսպողայ փողոցը, ուր մեծցած է լուսանկրիչը եւ ուր կը գտնուի Կիւլէրի ընտանիքի արհեստանոցը, արդէն պաշտօնապէս Արա Կիւլերի անունով կը կոչուի:
Նշենք, որ «Դարու լաւագոյն լուսանկարիչ» ճանչցուած Արա Կիւլեր, զոր նաեւ կ՛անուանեն «Սթամպուլի աչք», ծնած է 1928-ին Պոլսոյ մէջ: 1950-ին սկսած է լրագրողական գործունէութեան Yeni İstanbul պարբերականին մէջ: Ստացած է բազմաթիւ մրցանակներ եւ տիտղոսներ թէ՛ Թուրքիոյ, թէ՛ աշխարհի ամենայայտնի կազմակերպութիւններու կողմէ:
Ան լուսանկարներու միջոցով ներկայացուցած է համաշխարհային պատմութեան յայտնի դէմքեր, որոնց շարքին` Ուինսթըն Չըրչիլ, Առնոլտ Թոյնպի, Պերթրանտ Ռասըլ, Փիքասօ, Սալվատոր Տալի եւ այլք: