Իրաքի շիիթ «Հաշտի Շապի» խմբաւորման կազմին մէջ կռուող թուրքմէններու ջոկատի հրամանատար Եըլմազ Նէճճար յայտարարած է, որ իրենք թոյլ չեն տար, որ Քէրքուքը մնայ քիւրտերու ձեռքը:
Նշենք, որ ներկայիս նաւթային պաշարներով հարուստ Քէրքուքը կը մտնէ իրաքեան Քիւրտիստանի կազմին մէջ, ուր 25 սեպտեմբերին անկախութեան հանրաքուէ իրականացուեցաւ:
Նէճճար Պաղտատի մէջ թրքական «Dogan haber» գործակալութեան հետ զրոյցի ժամանակ, խօսած է իրենց յետագայ ընելիքներուն եւ նպատակներուն մասին: Ան մասնաւորապէս ըսած է, որ Քէրքուքը քիւրտերու ձեռքէն վերցնելու համար իրենք պատրաստ են «արիւն թափել» : Ան նաեւ ըսած է, որ Քէրքուքի մէջ համապատասխան միջոցառումներ ձեռնարկելու հարցով իրենք բանակցութիններ կը կայացնեն Իրաքի կեդրոնական իշխանութիւններուն հետ:
Խօսելով թուրքմեններու եւ Թուրքիոյ միջեւ յարաբերութիւններուն մասին, ան մասնաւորապէս ըսած է . «Մենք Թուրքիան կը համարենք մեր մերձաւորը, որովհետեւ մենք ալ, իրենք ալ թուրք ենք: Այդ տեսանկիւնէն կ'ակնկալենք անհրաժեշտ օգնութիւն ստանալ: Մասնաւորապէս կ'ուզենք այնպիսի օգնութիւն ստանալ, որմով կարենանք վերահսկողութեան տակ առնել սահմանները: Այստեղի նաւթային պաշարներուն մէջ մենք մեր բաժինը ունինք, սակայն ոչ մէկ բան չենք ստանար: Բնական է, որ մենք օգնութիւն պիտի խնդրենք Թուրքիոյ զինուած ուժերէն»:
Ան նկատած է, որ Իրաքի զինուած ուժերու 12-րդ զօրասիւնը, որ նախապէս տեղակայուած էր Քէրքուքի մէջ, պէտք է նորէն տեղակայուի իր նախկին տեղը:
Յիշեցնենք, որ շիիթ «Հաշտի Շապի» խմբաւորումը Իրաքի մէջ կը կռուի «Իսլամական պետութիւն» ահաբեկչական կազմակերպութեան դէմ: