Հալէպի համալսարանի հիւանդանոցին մէջ մանկական բաժին բացուած է, ուր բուժում պիտի ստանան հիւանդ երեխաներ: Այս մասին կը տեղեկացնէ Հալէպի մասին լուրեր հաղորդող ֆէյսպուքեան էջը, նշելով, որ բացումը երէկ կատարած են Հալէպի նահանգապետ Պրն. Հիւսէյն Տիապ եւ Սուրիոյ մէջ Եունիսէֆ-ի ներկայացուցիչ Ֆրան Էյքուիզա:
Բաժինի բացումը իրականցուած է հիւանդանոցի կառավարման մարմնի եւ Եունիսէֆ-ի համագործակցութեամբ: Նահանգապետը շրջած է բաժնէն ներս, այցելած հիւանդներուն եւ առողջութիւն մաղթած անոնց:
Հիւանդանոցի տնօրէն բժիշկ Իպրահիմ Հատիտ նշած է, որ վերապատրաստուած եւ ամբողջապէս վերականգնուած են բաժնի 23 սենեակներ, որոնք կը պարունակեն 40 անկողին: Պատրաստուած են նաեւ երկու դահլիճներ, որոնք պիտի օգտագործուին դասախօսութիւններ, գիտական հետազօտութիւններ կայացնելու համար:
Նշենք, որ այս ծրագիրը ֆինանսաւորուած է Եունիսէֆ-ի կողմէ եւ մաս կը կազմէ ՄԱԿ-ի Սուրիոյ մէջ իրականացուող մարդասիրական ծրագիրներուն: