Թրքական haberler.com լրատուական կայքը հաղորդած է, որ Օսմանեան կայսրութեան Մուրատ 3-րդ կայսրի գահակալութեան շրջանին (1574-1895), տեղի ունեցած է կապիկներու կոտորած:
Այդ շրջանին սուլթանը ունէր սիրելի կրօնաւոր մը (մոլլա), որ կը կոչուէր Ապտուլ Քերիմ: Ապտուլ Քերիմ կ’ատէր կապիկները, որոնք տարածուած էին Պոլսոյ մէջ, Հիւսիսային Ափրիկէ կատարուած արշաւներէն ետք:
Օր մը կրօնական քարոզի ժամանակ մոլլան կը յայտարարէ թէ կանայք քաղաքի տարածուած կապիկները կ’օգտագործեն պիղծ գործերու համար: Այս յայտարարութենէն ետք, աղօթքի հաւաքուած բազմութիւնը դուրս կ’ելլէ մզկիթէն եւ կ’ոչնչացնէ իր դիմաց յայտնուած բոլոր կապիկները:
Պատմաբաններու վկայութեամբ, մոլլան իր ձեռքով կապիկները կախաղան բարձրացուցած է: Պոլսոյ մէջ չէ մնացած ծառ մը, որուն ճիւղէն կապիկ չեն կախած:
Ժողովուրդը այս մոլլան կոչած է «մայմունքէշ»: Կը պատմուի, որ մոլլայի մահէն ետք կենդանակերները մեծ տօն կազմակերպած են:
Նշենք, որ այս մոլլան թշնամական վերաբերմունք ունէր նաեւ ոչ իսլամներու նկատմամբ եւ անոնց կը պարտադրէր, որ հագնին կարմիր եւ սեւ հագուստներ, որոնք ստորացուցիչ կը համարուէին: