image

«Ուիլիըմ Սարոյեան»ի անուան շքանշան պէյրութահայ տաղանդաւոր ասմունքող՝ Անի Եփրեմեան-Սարաֆեանին

«Ուիլիըմ  Սարոյեան»ի  անուան  շքանշան  պէյրութահայ տաղանդաւոր ասմունքող՝ Անի Եփրեմեան-Սարաֆեանին

Սփիւռքի նախարարութեան   յարկին  տակ  տեղի ունեցած  հանդիպման ընթացքին ՀՀ Սփիւռքի նախարար Տիկ. Հրանուշ  Յակոբեան  նախարարութեան բարձրագոյն՝ «Ուիլիըմ Սարոյեան» շքանշանը շնորհեց  պէյրութահայ  հասարակական գործիչ  եւ ասմունքող  Անի Եփրեմեան- Սարաֆեանին:

Նախքան շքանշանի շնորհումը     յատուկ խօսքով  հանդէս  գալով  ՀՀ Սփիւռքի նախարար  Տիկ. Հրանուշ Յակոբեան  ըսաւ ՝ «Անի  Եփրեմեանը   հայ արուեստին եւ մշակոյթին    նուիրուած անձնաւորութիւն է: Ան  յատկապէս  Պէյրութի        հասարակութեան մէջ   կարեւոր ներդրում   ունեցած է մեր դարաւոր բանաստեղծութիւնը հասանելի դարձնելու      իմասով  եւ   իր գործունէութեան  շնորհիւ  յաջողած է գրաւել   լիբանանահայութեան   սէրն ու  յարգանքը»: Նախարարը   ներկաներուն  յիշեցուց, որ        վաղը (28.7.2017)    տեղի  պիտի ունենայ  ընկհ.  Անի Եփրեմեանի    ասմունքի երեկոն, մաղթելով,  որ  պարգեւատրեալը     նոյն եռանդով եւ ոգիով  շարունակէ իր առաքելութիւնը:

 

 

  Ապա  ներկաներուն   իր սրտի խօսքը փոխանցեց    տիկ. Անի Սարաֆեան, որ ըսաւ «Այսօր նուիրական օր է ինծի   համար: Իսկապէս յուզուած եմ, որովհետեւ    երկար տարիներու  երազս  իրականութիւն  պիտի դառնայ»: Ան   շնորհակալութեան յատուկ խօսք  յայտնեց  Լիբանանի  մօտ   ՀՀ արտակարգ եւ  լիազօր դեսպան  պրն. Սամուէլ  Մկրտչեանին, ինչպէս նաեւ  դեսպանութեան  աշխատակից  ՝    պրն.   Վլատիմիր Պօղոսեանին   , որոնց  շնորհիւ   է  նաեւ , որ իրականութիւն    պիտի դառնայ         ասմունքի երեկոն:   Ընկհ. Եփրեմեան իր խօսքը եզրափակելով ըսաւ ՝ «Վաղուան  երեկոյան ինծի համար   կարեւոր    առիթ է, որովհետեւ առաջին անգամն է, որ  Հայաստանի      արուեստասէր հասարակութեան պիտի ներկայանամ ու  կը յուսամ, որ   հայրենի  հանդիսատեսը  գոհ կը  մնայ    ձեռնարկէն:    Տարբեր  գաղութներու մէջ  ելոյթներ ունեցած եմ, բայց   մայր հողին  վրայ     ասմունքելը այլ իմաստ ունի» ըսաւ ընկհ.  Եփրեմեան  եզրակացնելով, որ «Այդպէս է, որովհետեւ հայրենի  հողին վրայ   գտնուելով  մենք    մեզ  աւելի  ուժեղ կը զգանք»:

 

Նախքան  հանդիպման  աւարտը  ընկհ.   Եփրեմեան ընդառաջելով   Տիկն.  Հրանուշ  Յակոբեանի խնդրանքին   յուզումնախառն   շեշտով   ասմունքեց  Սիլվա  Կապուտիկեանի    մէկ բանաստեղծութիւնը:

Յայտնենք, որ նոյն հանդիպման ընթացքին   պարգեւներ ստացան    Ֆրնասայի     ՀԲԸՄ-ի «Ահազանգ»    թատերախոիւմբի բեմադրիչ եւ տնօրէն   ՝ Մկրտիչ Պասմաճեան  («Ուիլիըմ Սարոյեան»ի անուան   շքանշան )եւ     լիբանանահայ   երիտասարդ սիրող ճանապարհորդ Արարատ Ճէրէճեան (Երախտագիտութեան մետալ):

 

 ***

 Յիշեցնենք, որ  ՍԴՀԿ Լիբանանի օրկան     «Արարատ»  օրաթերթի  տնօրէնի պաշտօնը  վարող  Անի Սարաֆեան- Եփրեմեանի անունը ծանօթ  անուն է մշակութասէր  լայն  հասարակութեան մօտ:  Ան  ասմունքի  ելոյթներ ունեցած է, ոչ միայն Լիբանանի,    այլ  նաեւ սփիւռքի    տարբեր գաղութներու մէջ:

 

  Իւրայատուկ շեշտադրումներով,թելադրական  առոգանութեամբ եւ հաղորդական       ձայնով        օժտուած  հայուհին ամէնէն փայլուն  կերպով   կ'ասմունքէ ՝  Եղիշէ Չարենցի, Վահան Թէքէեանի, Դանիէլ Վարուժանի,Սիամանթոյի, Ռուբէն Սեւակի Յովհաննէս Շիրազի, Պարոյր  Սեւակի,         Սիլվա Կապուտիկեանի եւ այլ   յայտնի    բանաստեղծներու գործերը:

 

Ասմունքի    հանդէպ իր ունեցած         հետաքրքրութենէն բացի  Անի Եփրեմեան   կարեւոր  ներդրում ունի       Լիբանանի  «Նոր Սերունդ» մշակութային միութեան  «Արեգ» պարախումբի   հիմնադրման     գործին մէջ: «Արեգ»ը  շատ կարճ  ժամանակամիջոցի մէջ  յաջողեցաւ իր փայլուն ելոյթներով եւ անխափան  երթով դառնալ  Լիբանանի «Նոր Սերունդ» մշակութային      միութեան  մեծ ընտանիքին ամէնէն    փայլուն  ներկայացուցիչներէն մին։ Հոն եւս ակնառու է   Տիկ. Անի Եփրեմեանի  անսակարկ  նուիրումն ու ջանքերը՝  խումբը  դարձնելու  համագաղութային                յաջողութեան  հասած  եւ     լիբանանահայութեան     հպարտութիւն  առթող  պարախումբի: 

 

«Արեւելք» ի սրտէ  կը շնորհաւորէ  Տիկ. Եփրեմեանը,   մաղթելով     անոր   արեւշատութիւն եւ նորանոր   յաջողութիւններ իր  ազգանուէր    առաքելութեան  մէջ: