ՀՅԴ Լիբանանի Կենտրոնական կոմիտեն հոկտեմբերի 23-ին Լիբանանում ոգեկոչելու է 1985 թվականին Լիբանանում անհայտ հանգամանքներում առեւանգված ՀՅԴ ղեկավար Սարգիս Զեյթլյանի նահատակության 30-րդ տարելիցը: Սարգիս Զեյթլյանը համարվում է ՀՅԴ երեւելի ղեկավարներից: Ծնվել է 1930-ին` Մուսա Լեռան Խդր-Բեկ գյուղում: Եղել է Եգիպտոսի «Յուսաբեր»-ի, այնուհետեւ` Լիբանանի «Ազդակ»ի խմբագիրը: 1978 թվականից մինչեւ իր առեւանգումը Սարգիս Զեյթլյանը ՀՅԴ Բյուրոյի պաշտոնաթերթ «Ազդակ շաբաթօրեակ-Դրօշակ»-ի խմբագիրն էր: Հայտնի դաշնակցական գործչի առեւանգման եւ սպանության մանրամասները մինչեւ հիմա հայտնի չեն, բայց նրա առեւանգումը կապվում է 1980-ականների կեսերին թուրքական գաղտնի ծառայությունների հետ համագործակցած հակահայ եւ հակադաշնակցական խմբերի գործունեության հետ: 1985-ին Սարգիս Զեյթլյանի հետ առեւանգվել եւ սպանվել է նաեւ նրա թիկնապահ Կարո Գոլանջյանը: