Հայ Դատի Եւրոպայի գրասենեակը Պերլինի մէջ Գերմանիոյ Կանաչներու կուսակցութեան համանախագահ, Պունտեսթակի ազգութեամբ թուրք պատգամաւոր Ճեմ Օզտեմիրին յանձնած է Հայ Դատի ԱՄՆ Արեւմտեան ափի յանձնախումբի շնորհած «Ազատութեան Մրցանակ»ը: Այս մասին կը գրէ «artsakhpress.am» լրատուական կայքը:
Մրցանակն Օզտեմիրին շնորհուած է Հայոց Ցեղասպանութեան բանաձեւի ընդունման հարցին մէջ վերջինիս գործադրած ջանքերուն համար:
Պերլինի մէջ մրցանակը Պունտեսթակի պատգամաւորին յանձնած է Հայ Դատի Եւրոպայի գրասենեակի նախագահ Գասպար Կարապետեան:
«Պատիւ ունիմ: Հայերուն տառապանքները մոռացուած չեն»,- նշած է Օզտեմիր:
Նշենք, որ Ճեմ Օզտեմիր, որ 1994ին հանդիսացած էր Գերմանիոյ խորհրդարանի առաջին թուրք երեսփոխանը, 2004էն 2009ի միջեւ նաեւ Եւրոպական խորհրդարանի անդամ եղած է եւ հեղինակն է երկու հատորներու։
Ան Հայոց Ցեղասպանութեան հարիւրամեակի օրերուն Հայաստան այցելած էր՝ շեշտելով Գերմանիոյ խորհրդարանին կողմէ Ցեղասպանութեան ճամաչման կարեւորութիւնը։