15.09c
Երեվան
շբթ, ապր 20
Պատմական Մարութա լեռը եւ անոր գագաթին գտնուող Սուրբ Աստուածածին հայկական եկեղեցին այսուհետ հասանելի պիտի ըլլայ ուխտաւորներու համար: Թրքական «Anadolu» լրատուական գործակալութեան տեղեկացմամբ՝ Պաթմանի նահանգային ղեկավարութիւնը նախաձեռնած է դէպի լեռ տանող 8 քիլոմեթրանոց ճանապարհի կառուցման աշխատանքը, որ նախատեսուածի համաձայն՝ պիտի աւարտի մէկ ամիսէն:
Թուրքիոյ Պաթման նահանգի Սասոն (հայկական Սասունը) շրջանին մէջ գտնուող Մարութա լեռը տարածաշրջանի ամենաբարձր գագաթն է եւ ունի 2.973 մեթր բարձրութիւն:
Բաթմանի նահանգային խորհրդի անդամ Եըլմազ Չաքար նշած է, որ«այսուհետ տեղի հայերը եւ այլ ուխտագնացներ հնարաւորութիւն կ'ունենան այցելելու Մարութա Սուրբ Աստուածածին եկեղեցին, ինչը նախապէս անհնար էր՝ ճանապարհի բացակայութեան պատճառով»: Բաթմանի թանգարանի տնօրէն Վեհպի Եուրթն ալ յիշեցուցած է, որ Մարութա լեռան Սուրբ Աստուածածին եկեղեցին 2013-էն ի վեր յատուկ պահպանութեան տակ առնուած է: Սակայն, ըստ թուրք մասնագէտի, եկեղեցուոյ տարածքին կատարուած ուսումնասիրութիւններու ընթացքին եկեղեցուոյ կառուցման թուականի եւ պատմութեան վերաբերեալ որեւէ գրութիւն չէ յայտնաբերուած:
Նշենք, որ եկեղեցին Մարութա Բարձր Աստուածածին անուամբ կը յիշատակուի «Սասնայ Ծռեր»ու մէջ: Ըստ աւանդութեան՝ եկեղեցին կառուցուած է Մեծ Մհերի պատուէրով: Այն աւերուած է Մսրա Մելիքի կողմէ, իսկ աւելի ուշ Դաւիթ այն մէկ օրուայ ընթացքին վերականգնած է:
