image

Նախընտրական արշաւը ընթացք պիտի առնէ ՝ 7 Յունիսին

Նախընտրական արշաւը ընթացք պիտի առնէ ՝  7 Յունիսին

 

Հայաստանի մէջ արտահերթ խորհրդարանական ընտրութիւններու համար նախընտրական քարոզարշաւը պիտի մեկնարկի 7 յունիսին եւ պիտի տեւէ մինչեւ 18 յունիսը, ժամը 24:00-ը: Համապատասխան որոշումը ընդունուած է Կեդրոնական ընտրական յանձնաժողովի 11 մայիսի նիստին:

ՀՀ ազգային ժողովի 20 յունիս 2021-ին կայանալիք արտահերթ ընտրութիւններու նախապատրաստման եւ կայացման հիմնական միջոցառումներու ժամանակացոյցը հաստատելու մասին նախագիծը ներկայացուցած է ԿԸՅ նախագահ Տիգրան Մուկուչեանը:

«Նախընտրական քարոզչութեան ժամանակահատուածը մեկնարկելու է 2021 թուականի յունիսի 7-ից մինչեւ յունիսի 18-ը ժամը 24:00-ն: Թեկնածուների, կուսակցութիւնների կամ դաշինքի անդամ կուսակցութիւնների ինքնաբացարկի մասին դիմումների ներկայացման ժամկէտը մինչեւ յունիսի 10-ը ժամը 18:00-ն է»,-ըսած է Մուկուչեանը:

Ընտրական տեղամասերու կազմաւորումը տեղի պիտի ունենայ մինչեւ 2021 թուականի 26 մայիսը, կուսակցութիւնները, կուսակցութիւններու դաշինքը գրանցման համար փաստաթուղթերը ԿԸՅ պիտի ներկայացնեն քուէարկութեան օրէն ոչ ուշ, քան 25 օր առաջ մինչեւ ժամը 18:00-ը, այն է՝ 26 մայիս 2021-ը մինչեւ ժամը 18:00-ը:

Կուսակցութիւններու, կուսակցութիւններու դաշինքներու ընտրական ցուցակներու գրանցման համար նախատեսուած է ժամկէտ՝ 2021 թուականի 26 մայիսէն 30 մայիսը: Ընտրողներու ցուցակները տեղամասային կեդրոններուն մէջ բոլորին համար տեսանելի վայրի մէջ պիտի փակցուին 31 մայիսին: