23.09c
Երեվան
հնգ, ապր 18
Ռուսաստանի հայկական սփիւռքը անհանգստացած է Հայաստանի մէջ ստեղծուած իրավիճակի կապակցութեամբ` գործող վարչապետ՝ Նիկոլ Փաշինեանի` հրաժարական տալու յամառ դժկամութեան եւ անոր խումբի կործանարար գործողութիւններու պատճառով: Այս մասին ըսուած է Ռուսաստանի հայերու միութեան յայտարարութեան մէջ:
«Չկարողանալով յաղթահարել որեւէ խնդիր տնտեսական եւ ընկերային ոլորտներում, որոնք կարող են բարելաւել մարդկանց կեանքը, երկիրը դէպի պատերազմ եւ քափիտուլեացիա (անձնատուութիւն) տանելով, առանց պատերազմի պատճառների, ընթացքի ու արդիւնքների հետաքննութեան յանձնաժողով ստեղծելու` Փաշինեանը, թաքնուելով ժողովրդի անուան տակ, շարունակում է համաձայնողական քաղաքականութիւնը, որը դէպի պետականութեան կորստի եւ երկրի բնակչութեան կեանքի վատթարացման է տանում:
Ռուսաստանի հայերի միութեան դիրքորոշումը բազմիցս արտայայտուել է եւ մնում է անփոփոխ. Փաշինեանը եւ նրա ամբողջ խումբը պէտք է հրաժարական տան: Իշխանութեան մնալու նրանց իւրաքանչիւր լրացուցիչ րոպէ անդառնալի վնաս է հասցնում հայոց պետականութեանը եւ ամբողջ հայ ժողովրդին: Մենք պաշտպանում ենք Հայաստանի Զինուած ուժերի Գլխաւոր շտաբի ուշացած, սակայն արդար պահանջը Փաշինեանի հրաժարականի մասին:
Այն փաստը, որ պատերազմում Հայաստանի պարտութեան, հազարաւոր մարդկային կորուստների եւ Արցախի մեծ մասի կորստի համար պատասխանատու Փաշինեանի եւ նրա խումբի մնալն իշխանութեան գլխում ազգային նուաստացում է եւ էլ աւելի մեծ կորուստների է յանգեցնում` դատապարտուածութեան եւ յուսահատութեան զգացողութիւն ստեղծելով:
Յատկանշական է, որ այսօր Փաշինեանի բռնապետական ռեժիմին բացայայտօրէն աջակցում են Թուրքիայի ղեկավարները` Էրտողանը, Չաւուշօղլուն, եւ այլոք` նրանք, ում վրայ, ինչպէս եւ` Ալիեւի, դեռ չի սառել մեր որդիների արիւնը, եւ ովքեր արդէն պատերազմի աւարտից յետոյ շարունակում են իրենց հայատեաց հռետորաբանութիւնն ու յանդուգն յարձակումները, որոնք նուաստացնում են մեր երկրի եւ մեր ժողովրդի արժանապատուութիւնը:
Մենք վստահ ենք, որ Փաշինեանի հրաժարականը, որը ժամանակի եւ Հայաստանի եւ սփիւռքի բոլոր հայրենասէր ուժերի հրամայականն է, թոյլ կու տայ շրջել մեր պատմութեան այս խայտառակ էջը, եւ պայմաններ կը ստեղծի, որպէսզի մեր ժողովուրդը կրկին ոտքի կանգնի, երկրի տնտեսական զարգացման դրական օրակարգ ձեւաւորի եւ վերականգի իր վստահութիւնն ու յարգանքը տարածաշրջանում եւ աշխարհում»:
