Հալէպէն տխուր լուր ստացանք։ Այսօր իր մահկանացուն կնքած է հալէպահայ երիտասարդ գործիչ ՝ Յուշիկ Ղազարեանը։
Այս մասին տեղեկութիւնը տրուած է «Գանձասար»ին կողմէ։
Յուշիկ Ղազարեանի մահուան տխուր առթիւ թերթին յղուած ցաւակցագրերուն մէջ կը նշուի, որ հանգուցեալը եղած է անդամ Հալէպի Համազգայինի Շրջանային Վարչութեան եւ եռանդուն գործունէութիւն տարած՝ Հալէպի Համազգայինի «Լեւոն Շանթ» թատերական միաւորի շրջանակներուն մէջ։
Ան եղած է նաեւ Հալէպի «Գանձասար» շաբաթաթերթի աշխոյժ գրիչներէն մին։
Ըստ ընկերային ցանցերու վրայ ներկայացուած տուեալներուն Յուշիկ Ղազարեան մահացած է «Քորոնա» վարակին հետեւանքով։
Այս տխուր առթիւ «Արեւելք» իր ցաւակցութիւնները կը յղէ հանգուցեալի հարազատներուն, ինչպէս նաեւ «Գանձասար» թերթի ընտանիքին։