ՀՀ սննդամթերքի անվտանգութեան տեսչական մարմինը անասնահամաճարակային մշտադիտարկումներու ծիրէն ներս եւ սպանդանոցային մորթի պարտադիր չափանիշի ներդրման զուգահեռ, շրջայցեր կատարած է միսի իրացման շուկաները: Այս մասին տեղեկացուցած է ՀՀ Կառավարութիւնը։
Սննդամթերքի ոլորտը վերահսկող մարմնի տեսուչները վաղ առաւօտեան, շուկաներու միսի մատակարարման ժամուն, ստուգայց կատարած են Երեւանի Խորենացի փողոցի միսի տաղաւարները (ԳՈւՄ-ի շուկային յարող տարածքը), նպատակ ունենալով հսկել թէ՛ ստացուած միսի ծագումը, թէ՛ միսի տեղափոխման պայմանները եւ թէ՛ տաղաւարներու նաքրութեան եւ առողջապահական չափանիշերու պահպանումը:
Տեսչական մարմնի մասնագէտները այցելած են այդ պահուն գործող 9 տաղաւարները, ստուգած են ստացուած մսեղէնին վերաբերող անասնաբուժական փաստաթուղթերը: Բոլոր 9 տնտեսավարողներուն մօտ ալ արձանագրուած են խախտումներ: Տնտեսավարողներէն միայն մէկը ունեցած է միսի սպանդանոցային ծագումը հաւաստող թիւ 5 անասնաբուժական փաստաթուղթը: Քանի մը տեղ միսի տեղափոխումը իրականացուած է առողջապահական եւ սահմանուած այլ չափանիշերուն չհամապատասխանող փոխադրամիջոցներով, իսկ տաղաւարներէն երկուքին աշխատակիցները չեն ունեցած առողջապահական գրքոյկներ:
Կազմուած են արձանագրութիւններ, որոնց հիման վրայ պիտի բացուին ստուգումներ, յստակ վարչական պատասխանատուութիւն ենթադրող հետեւանքներով:
Յիշեցնենք, որ սպանդանոցային մորթի պահանջը ողջ հանրապետութեան մէջ պարտադիր դարձած է 1 յուլիս 2020-ին, ինչ որ կը նշանակէ, այդ նորմի պահպանումը պիտի ըլլայ ՍԱՏՄ-ի (Սննդամթերքի Անվտանգութեան Տեսչական Մարմին) ուշադրութեան կեդրոնը, որպէս պետական այս կառոյցի գործունէութեան առաջնահերթութիւններէն մէկը: