Թուրքիոյ խորհրդարանէն ներս երկրորդ քաղաքական ուժի առաջնորդ Քեմալ Քըլըչտարօղլուն, քննադատելով իշխանութիւններու վարած քաղաքականութիւնը, յայտարարած է, որ Թուրքիոյ տնտեսական վիճակը վատ է:
«Ամէն տան մէջ գործազուրկ կայ: 17 տարուան ընթացքին պէտք է թռիչք տեղի ունենար, բայց յետընթաց տեղի կ'ունենայ»,- ըսած է ան:
Ընդդիմադիր Ժողովրդահանրապետական կուսակցութեան առաջնորդն իշխանութիւններու՝ բանակի ոլորտի մէջ վարած քաղաքականութեան վերաբերեալ նշած է, որ բանակը «քարուքանդ ըրած են»:
«Այս երկրին մէջ գլխաւոր շտապի պետին որպէս ահաբեկիչ կը կալանաւորեն, յետոյ ազատ կ'արձակեն: Պետութեան զէնքի գործարանը կը վաճառուի Քաթարին, կը մասնաւորեցուի: ԱՄՆ-ի մէջ նաւահանգիստ մը վաճառուեցաւ սէուտցիներուն, բոլորը իրար խառնուեցան, իսկ այստեղ զէնքի գործարան կը վաճառուի»,- նշած է ան:
Աւելի վաղ Թուրքիոյ իշխանութիւններուն քննադատութեան ենթարկածէր Ժողովրդահանրապետական կուսակցութենէն պատգամաւոր Ապտուլլաթիֆ Շեները՝ յայտարարելով, որ 17 տարի միանձնեայ իշխանութիւն հանդիսացող «Արդարութիւն եւ զարգացում» կուսակցութիւնը երկիրը վատ կառավարած է: