image
Հրատապ լուրեր:

Մահացած է երգահան Եուրի Յարութիւնեանը

Մահացած է երգահան Եուրի Յարութիւնեանը

 

ՀՀ կրթութեան, գիտութեան, մշակոյթի եւ սփորթի նախարարութիւնը խոր վիշտով կը տեղեկացնէ, որ 23 օգոստոսին 75 տարեկան հասակին կեանքէն հեռացած է երգահան, ՀՀ արուեստի վաստակաւոր գործիչ Եուրի Յարութիւնեանը:   

 

Եուրի Յարութիւնեանը ծնած է 25 մարտ 1944 -ին, Կիրովապատ: 1972-ին աւարտած է է Երեւանի Կոմիտասի անուան պետական երաժշտանոցը: 1967 թուականէն աշխատած է «Հայֆիլմ»ի մէջ, որպէս երաժշտական ձեւաւորող, ապա` երաժշտական խմբագիր: Հեղինակած է աւելի քան 70 ֆիլմերու երաժշտութիւն. «Մարդն Օլիմպոսից», «Պաղտասարը բաժանւում է կնոջից», «Զինուորն ու փիղը», «Կեանքի լաւագոյն կէսը», «Խոշոր շահում», «Մեր պապերի քայլերգը», «Սիրամարգի ճիչը», «Անիծուածները», «Ձայն բարբառոյ», «Ուրախ աֆթոպուս», «Օգոստոս», «Ռեքվիէմ», «Խենթ հրեշտակը», «Հերոստրատ», «Տխուր փողոցի լուսաբացը» եւ այլն: Գրած է նաեւ մի քանի վաւերագրական ֆիլմերու երաժշտութիւն, որոնց շարքին` «Հայկական ՍՍՀ», «Հայաստանն այսօր», «Քերամիքայի վարպետները», «Ինչպէս է կոփւում արծաթը»:

2004-2013 թուականներուն եղած է Հայաստանի Քոմփոզիթորներու միութեան պատասխանատու քարտուղարը: 2012-ին Եուրի Յարութիւնեանը արժանացած է ՀՀ արուեստի վաստակաւոր գործիչի կոչման: Նոյն թուականին արժանացած է նաեւ «Հայակ» հայկական ամենամեայ առաջին շարժանկարի մրցանակաբաշխութեան «Լաւագոյն երգահան» մրցանակին:

Եուրի Յարութիւնեանը բացառիկ մտաւորական էր, սեփական մշակոյթի նուիրեալ, որ ունէր առանձնայատուկ ձեռագիր եւ անջնջելի հետք թողած է հայ երաժշտարուեստի մէջ:

Եուրի Յարութիւնեանի պայծառ յիշատակը երկար պիտի մնայ գործընկերներու, մտերիմներու, արուեստասէր հասարակութեան սրտերուն մէջ: