image

Այնճար. Տեղի ունեցաւ ԼՕԽ-ի կազդուրման կայանի ամավերջի հանդէս

Այնճար.  Տեղի  ունեցաւ ԼՕԽ-ի կազդուրման  կայանի ամավերջի  հանդէս

Լիբանանահայ օգնութեան խաչի մարդասիրական ծրագիրներուն մէջ անմիջական եւ գլխաւոր տեղ գրաւած են նաեւ հայ մանուկները: Թէ՛ ԼՕԽ-ի «Նարօտ Արտալճեան» գրադարանը, թէ՛ ԼՕԽ-ի Կազդուրման կայանը կը միտին հայ մանուկներուն հոգին ուրախացնել եւ իրենց ստեղծագործական միտքը զարգացնել: Կազդուրման կայանի ծրագիրը կ՛իրականացուի հովանաւորութեամբ ԼՕԽ-ի Շրջանային վարչութեան եւ կազմակերպութեամբ ընկերային յանձնախումբին:

 Այս առումով տարիներ առաջ ընթացք առած ԼՕԽ-ի Կազդուրման կայանը այս տարի եւս իր դաստիարակչական ծրագիրին մեկնարկը կատարեց ուրբաթ, 2 օգոստոս 2019-ին, Այնճարի ԼՕԽ-ի «Ալեքսան եւ Արաքսի Գլպաշեան» կազդուրման կայանի շէնքին մէջ: 6-12 տարեկան մանուկներ իրենց պատասխանատուին եւ օգնականներուն հետ երկու շաբաթներու ընթացքին հետեւեցան մշակուած դաստիարակչական, ընկերային եւ ազգային ծրագիրին: Անոնք հաճելի ժամեր անցուցին եւ Այնճարի կլիմայէն օգտուելով կազդուրուած վերադարձան Պէյրութ:

Կազդուրման կայանի ամավերջի հանդէսը տեղի ունեցաւ կիրակի, 18 օգոստոս 2019-ին, Այնճարի «Ալեքսան եւ Արաքսի Գլպաշեան» կազդուրման կայանի շէնքի շրջափակին մէջ: Հանդէսին ներկայ գտնուեցան ՀՅԴ Լիբանանի Կեդրոնական կոմիտէի անդամ Լուի Նատեր, ՀՅԴ «Կարմիր լեռ» կոմիտէի ներկայացուցիչը, Այնճարի քաղաքապետ Վարդգէս Խօշեան, Այնճարի Ս. Պօղոս եկեղեցւոյ հոգեւոր հովիւը, ԼՕԽ-ի Շրջանային վարչութեան ատենապետ Սիլվա Սապունճեան եւ Շրջանային վարչութեան անդամներ, Կազդուրման կայանի բարերարներ Յակոբ եւ Թալին Գլպաշեան ամոլը, ծնողներ, բարերարներ եւ բարեկամներ: