«Ակոս», Թուրքիա. Հարցազրույց Կ.Պոլսի Հայոց պատրիարքի թեկնածու Գուգարաց թեմի առաջնորդ Գերաշնորհ Տեր Սեպուհ արքեպիսկոպոս Չուլջյանի հետ:
-Սրբազան Հայր, ինչպե՞ս եք գնահատում Պոլսո պատրիարքի ընտրության շուրջ վերջերս տեղի ունեցած զարգացումները և´ Ստամբուլում, և´ Էջմիածնում ու ինչպիսի՞ն է Ձեր կարծիքը պատրիարքի տեղապահի ընտրության հարցի վերաբերյալ:
-Վերջին օրերին Պոլսո հայ համայնքում էլ ավելի բորբոքված և Մայր Աթոռ Սուրբ Էջմիածնում որոշակի լուծման հասած վիճակը` կապված պատրիարքական ընտրությունների հետ, լավատեսության և ողջախոհության հույսեր է ստեղծել: Ի սկզբանե մեզ շատերիս հայտնի էր այն մտահոգությունը, որ ներհամայնքային անհամաձայնություններն ու տարակարծությունները լուրջ խոչընդոտ էին դարձել Պատրիարքի ընտրության հեշտ ու գործնական խնդիրը լուծելու ճանապարհին: Սակայն այսօր արդեն նկատվում են հանդուրժողականության և փոխադարձ ընկալման ծիլեր, որոնք պետք է տանեն դեպի թնջուկի լուծում:
Այս տեսանկյունից նախևառաջ կարևորում եմ առաջիկայում սպասվող Պոլսո պատրիարքական տեղապահի ընտրությունները, որին իրավունք ունեն մասնակցել այդ աթոռը ներկայացնող իմ հոգևոր երեք եղբայրները:
-Սրբազան Հայր, նկատի ունենալով տեղապահական ընտրության նրբությունները և պահի լրջությունը, ին՞չ խորհուրդ կտաք, ին՞չ անել նախորդ սխալները չկրկնելու համար:
-Հաշվի առնելով Պոլսո Աթոռի երկու սրբազանների միջև առաջացած անցանկալի զարգացումները և գնահատելով հաստատված դրական մթնոլորտը, ինչպես նաև հարցի օբյեկտիվ լուծման կարևորությունը` անկալի է, որ թեկնածուն չեզոք անձ լինի: Այս պարագային ես եղբայրաբար կոչ եմ անում Պոլսո Աթոռի հոգևոր դասին`հոգեշնորհ և արժանապատիվ քահանա հայրերին, պատրիարքի տեղապահի ընտրության ժամանակ իրենց ձայնը տալ իր փորձառությամբ և բարի համբավով վաղուց իր տեղը ամրապնդած իմ ավագ եղբորը` Գարեգին արքեպիսկոպոս Բեքչյանին: Վստահ եմ, որ իմ Սրբազան եղբայրը կկարողանա շատ արագ կազմակերպել և լուծել իր առջև դրված խնդիրը` առավելագույն անկողմնակալությամբ և պատշաճ մակարդակով:
-Իսկ ստեղծված վիճակը ինչպե՞ս կարող է ազդել արդեն պատրիարքի ընտրության հարցի վրա, ավելի շատ լավատեսության թե՞ վատատեսության ակնկալիք ունեք:
- Ուրախությամբ պետք է նկատեմ, որ այս դրական մթնոլորտը տեսանելի է պատրիարքական Աթոռի բնական թեկնածուներիս և համայն բարեպաշտ հավատացյալների մոտ: Եվ շեշտվում այն հանգամանքը, որ պայքարը ոչ թե անձերի ամբիցիաները բավարարելուն պետք է ուղղվի, այլ եկեղեցական և համայնքային խնդիրները լուծելուն: Վստահ եմ, որ հոգևոր և աշխարհիկ մեր եղբայրներն ու քույրերը կանեն այն ամենը, որ տեղապահ Սրբազանը սիրո և փոխադարձ հարգանքի մթնոլորտում կազմակերպի ընտրությունների անցկացումը և այլևս չի կրկնվի Պոլսո հայության փառքն ու պատիվը ստվերող գործողություններ և երևույթներ: Հուսով ենք, որ առաջիկա, թեկուզ և շատ ուշացած, պատրիարքական ընտրություները օբյեկտիվ ու մրցակցային անցնելով պետք է վերականգնեն Պոլսո հայ համայնքի և բարեպաշտ ժողովրդի տարիներ շարունակ միտումնավոր խաթարված միասնականությունը, փոխադարձ վստահությունը և անդորրը: Սակայն այդ ցանկալի և հեռագնա ճանապարհին ամեն քայլ պետք է կարևորվի, իսկ տեղապահի ընտրությունը և դրանով պայմանավորված ընտրությունների բնականոն անցկացումը առաջին և պարտադիր քայլն է:
-Սրբազան Հայր, համայնքի հետ հանդիպումներ անցկացնելու համար եր՞բ եք մտադիր ժամանել Ստամբուլ:
– Նախ նկատեմ, որ ինձ միշտ էլ մեծ բերկրանք է պատճառում Պոլիս և Թուրքիո այլ բնակավայրեր այցելելը ու մեր բարեպաշտ ժողովրդի հետ հանդիպելը: Առիթի և աշխատանքային ծանրաբեռնվածության թույլ տված հաճախականությամբ սիրով այցելում եմ Թուրքիա: Իսկ ինչ վերաբերում է որպես պատրիարքի թեկնածու այցին և համայնքի հետ հանդիպումներին, ապա ասեմ, որ աղոթքով, հույսով և բարի մաղթանքներով ու ակնկալիքներով ենք սպասում պատրիարքական տեղապահի ընտրությանը: Դրանից հետո ինչպես և պահանջում է եկեղեցական կարգը, Պոլսո աթոռից պաշտոնական նամակներ կուղարկվեն պատրիարքի բոլոր թեկնածուներին և ես էլ որպես թեկնածու կկարողանամ հանդիպել մեր բարեպաշտ ժողովրդի հետ: