Պոլսոյ «Ակօս»-ը ունի երկու տագնապ, որոնց երկուքն ալ առայժմ իրենց լուծումը գտած ըլլալէ հեռու են. մէկը՝ պատրիարքական ընտրութիւնն է, որուն լուծումը այնքան ալ իրենցմէ կախեալ չէ, իսկ երկրորդը՝ լեզուական է, որուն պէտք է կարելի ըլլայ լուծում մը բերել, բայց եւ այնպէս ան կ’ուշանայ, եթէ իրապէս տեղի պիտի ունենայ օր մը:
Մաղթենք որ շատ չուշանայ, առանց միւս կողմէ մտահան ընելու, թէ այս ընթացքով կրնայ կացութիւնը նաեւ...վատթարանալ: Մինչդեռ անոր գլուխը կը գտնուին խոստմնալից տարրեր, որոնք պէտք է յաջողէին փարատել մեր այս վախը:
* *
*
Մեր քննարկումին համար մեկնակէտ կ’առնենք ընթացիկ յունիս մէկի թիւի քանի մը յօդուածները միայն:
***«Երանելի են բոլոր այն երկիրները, որոնք իրենց խնդիրները կը յաջողին լուծել ժողովրդավարութեան սկզբունքներու մէջ։ Ցաւօք որ մենք չենք ապրիր նման երկրի մը պայմաններով»։
---Կ’ակնկալուէր, որ ըսուէր՝ սկզբունքներով եւ պայմաններուն մէջ, բայց ահա գրուած է ճի՛շդ հակառակը. աւերիչ ձեռք մը փոխած է բառերուն տեղը. ուրեմն՝ «Երանելի են բոլոր այն երկիրները, որոնք իրենց խնդիրները կը յաջողին լուծել ժողովրդավարութեան սկզբունքներով։ Ցաւօք որ մենք չենք ապրիր նման երկրի մը պայմաններուն մէջ»։
***«Ոչ միայն մենք, այլ աշխարհի բազում ժողովուրդներու համար այս մէկը երազ մըն է պարզապէս»։
---Արեւմտահայը անդուլ հալածող նոյն հրէշն է, որ չի զգետնուիր եւ ամէն առիթով գլուխը կը ցցէ. ոչ միայն...այլ փոխանակ ոչ միայն...այլեւ-ի:
Բաց աստի, մենք դերանունը պէտք է դրուէր տրական հոլով, ինչպէս դրուած է ժողովուրդներու գոյականը, որուն համադասուած է ինք: Համադաս անդամները պարտաւոր են քերականօրէն համասեռ ըլլալու. ուրեմն՝
«Ոչ միայն մեզի, այլեւ աշխարհի բազում ժողովուրդներու համար...» եւ այլն:
***«Եթէ խօսինք արեւմուտքի հաշւոյն պիտի կրնանք պնդել»…
---Եւ ըսել, որ ահա շաբաթներէ ի վեր հաշւոյն-ը կը կը հալածենք աշխարհի չորս ծագերուն, իրար կ’անցընենք աղանդաւորներ «Պայքար»-ն ու Պարոյր Աղպաշեանը՝ խնդրելով, աղաչելով, պաղատելով, հրամայելով ու կանոնագրելով, որ գրեն հաշուոյն, ինչպէս կը պահանջէ Մեսրոպ(եան ուղղագրութիւնը):
Պէտք կա՞յ ըսելու, որ մեր բոլոր յորդորները «Ակօս»-ին եւս կը հասնին:
Միայն ւ-ով կը գրուին այն բառերը, որոնք ի-ով կը վերջանան. այսպէս՝ հոգի-հոգւոյն, տեղի-տեղւոյն, եկեղեցի-եկեղեցւոյ եւ այլն:
Իսկ իւ-ը ու կը դառնայ. այսպէս՝ հաշիւ-հաշուոյն, պատիւ-պատուոյն, հազիւ-հազուագիւտ, թիւ-թուական, պատիւ-պատուական, հաշիւ-հաշուապահ եւ այլն:
***«Այս հարցումները ինքնաբերաբար տեղի կու տան յաջորդներուն»։
---Միտքը այն է, որ այս հարցումները ծնունդ կու տան կամ պատճառ կը դառնան ուրիշ հարցումներու. միայն թէ այս միտքը տեղի տալ բայով չի թարգմանուիր:
Հետեւինք՝
ա) տեղ տալ
Կը նշանակէ հիւրընկալել, ճամբայ տալ, թոյլատրել, որ բան մը յառաջանայ, աճի, զարգանայ, մէջտեղ գայ. ահա ա՛յս բայն է, որ պէտք է կիրարկուէր մէջբերուած նախադասութեան մէջ:
բ) տեղի տալ
Կը նշանակէ ունեցածը զիջիլ, յանձնել ուրիշին, նահանջել, դադրիլ պայքարելէ. օրինակ՝ կռփամարտիկը տեղի տուաւ, դիրքը պաշտպանողները տեղի տուին, Սարգիսեան ժողովուրդի պահանջին անսալով տեղի տուաւ:
գ) տեղիք տալ
Կը նշանակէ առիթ տալ, պատճառ դառնալ. օրինակ՝ անոր ընթացքը չարախօսութեան տեղիք տուաւ, այդ վերաբերումդ կասկածներու տեղիք տուաւ, սխալներդ քննադատութեան տեղիք տուին:
***«Միայն Աֆղանիստանով չաւարտիր»...
---Պէտք է ըլլայ չ’աւարտիր:
***«Բոլոր այն երկիրները որոնք պիտի փորձեն Հայաստանի օրինակին հետեւելու, պարտին նախ բարձրացնեն իրենց ազգային գիտակցութիւնը»...
---Պէտք է ըսել հետեւիլ, քանի փորձել ներգործական է եւ հայցական հոլով կը պահանջէ՝ պիտի փորձեն հետեւիլ:
Դժբախտաբար օտար լեզուները յաճախ մեր գրողներուն մէջ աւելի զօրաւոր տպաւորուած են, քան հայերէնը. այս պարագային ֆրանսերէնը, որ կ’ըսէ՝ essayer de suivre, եւ անգլերէնը, որ կ’ըսէ՝ try to follow: Ահա այս վերջիններուն թարգմանութիւնն է հետեւելու տրականը:
Բաց աստի, պէտք է ըսել նաեւ բարձրացնել. այսինքն՝ «պարտին նախ բարձրացնել»:
Ուրեմն՝
«Բոլոր այն երկիրները որոնք պիտի փորձեն Հայաստանի օրինակին հետեւիլ, պարտին նախ բարձրացնել իրենց ազգային գիտակցութիւնը»...:
***«Շատեր պետութեան հիմնադրումը կը փորձեն բացատրել զանազան գործօններու խաչաձեւման հետեւանքով»։
Հետեւանքով բառը թէ՛ սխալ է, թէ՛ աւելորդ:
ա) Սխալ է, քանի որ հիմնադրումը դրական երեւոյթ է, որուն հետ համատեղելի չէ հետեւանքով յետադրութեան իմաստը, որ հակառակն է:
բ) Միւս կողմէ՝ աւելորդ ալ է. կը բաւէ ըսել՝ «գործօններու խաչաձեւումով»,– այսինքն՝ խաչաձեւումով գործիականը ամէն բան ըսած կ’ըլլայ արդէն:
***«Մահէն ետք աւելի յստակ կը տեսնեմ, որ որքան շատ ու շատերու դպչած է իմ սիրելի քեռայրը»։
---Երբ ստորադաս նախադասութեան մէջ հարցական բառ մը կայ՝ որքան, ինչու, ինչպէս, ուր, քանի եւ այլն, այդ նախադասութիւնը պէտք է սկսիլ թէ շաղկապով եւ ոչ թէ որ շաղկապով:
Միւս կողմէ՝ դպչիլ բայը կու տայ դպած, այսինքն՝ չ բաղաձայնը կը կորսուի. նաեւ՝ փլչիլ-փլած, թռչիլ-թռած, կպչիլ-կպած, փախչիլ-փախած:
Ուրեմն՝
«Մահէն ետք աւելի յստակ կը տեսնեմ, թէ որքան շատ ու շատերու դպած է իմ սիրելի քեռայրը»։
***«Ո՛չ իզուր չէ երբե՛ք իր վաստակը»:
---Խնդրոյ առարկան վաստակն է, որ գոյական մըն է եւ պէտք ունի ածականի մը: Իզուր մակբայ է, ածական չէ: Ուրեմն՝ «իզուր վաստակ» չ’ըսուիր: Պէտք է ըսել՝ «զուր վաստակ»:
Բաց աստի, Ո՛չ-ին կից պէտք է ստորակէտ մը դնել, իսկ յաջորդ շեշտն ալ պէտք է դնել չէ բային վրայ:
Ուրեմն՝ «Ո՛չ, զուր չէ՛ երբեք իր վաստակը»:
***«Այսօր մեզ հետ կը սգան իր կորուստը»...
---Պէտք է ըլլայ մեզի հետ կը սգան...:
***Աննախադէպներ կ’ապրուին Թուրքիոյ քաղաքական պատմութեան մէջ...
---Հայերէնը ունի աննախադէպ ածականը, սակայն չունի աննախադէպ գոյականը, որպէսզի ասոր յոգնակին կիրարկենք: Այլանդակ կառոյց մըն է այս, որուն...առաջին անգամն է, որ կը հանդիպիմ թէկուզ...պոլսահայ մամուլի մէջ, որքան ալ յառաջապահ դիրքերու վրայ գտնուի ան՝ բաղդատած արեւմտահայ աւանդապահ մամուլին:
Յետոյ, ուրիշ այլանդակութիւն մըն ալ այս կ’ապրուին բայն է:
Կարելի չէ՞ կոկիկ ու իմանալի հայերէնով մը ըսել. «Աննախադէպ իրադարձութիւններ տեղի կ’ունենան Թուրքիոյ...մէջ»: Այս չէ՞ ըսել ուզուածը:
***«Կ՛երեւի տնտեսական ճգնաժամը զիրենք պարտադրեց աւելի կանուխ թուականի մը»։
---Մենք կը պարտադրենք բան մը՝ մէկուն. բերուած օրինակին մէջ ճիշդ հակառակն է. պարտադրած ենք մէկը՝ բանի մը, որ անհեթեթ է:
Հետեւինք օրինակներուն՝
Մոգերը պարտադրեցին հայերուն պաշտել կրակը:
Դահիճը պարտադրեց մահապարտին խոնարհել գլուխը:
Ատեանը պարտադրեց վարձակալին պարպել բնակարանը:
Մելիք պարտադրեց գիւղացիներուն սուրին տակէն անցնիլ:
Վասակ պարտադրեց Վարդանին իրեն հետեւիլ:
Հաւատաքննութիւնը պարտադրեց Կալիլէին ուրանալ իր գիւտը:
Ուրեմն գրենք՝
«Ճգնաժամը անոնց պարտադրեց աւելի կանուխ թուական մը»։
***«Յղիացումը Նաիրի, պտղաբերում է»...
«Բայց Նաիրի, գիտե՞ս»...
«Մեր անկախութեան տօնին Նաիրի, երկիրՆաիրին թող յղիանայ»…
---Ընդգծուած Նաիրի-ները կոչական են. ուրեմն՝ ձախին կը պահանջեն մէկակակն ստորակէտ:
Եւ վարձքերնիդ կատար:
Զձերդ ի ձերոց ձեզ մատուցանեմ:
Արմենակ Եղիայեան