Եւրոպայի սահմանները կրնան կրկին փակուիլ, եթէ «Քորոնա» ժահրով վարակուածներու թիւի կտրուկ աճ ըլլայ Եւրոպական Միութեան այս կամ այն երկիրին մէջ։ Այս մասին dpa-ին տուած հարցազրոյցի ընթացքին յայտարարած է Գերմանիոյ արտաքին գործոց նախարար Խայկօ Մաասը։
Ան նշած է, որ նման որոշումները պէտք է համաեւրոպական մակարդակով համակարգուին եւ քուէարկութեան դրուին։
«Քորոնա» ժահրի համավարակի սկզբնաւորութեան, Եւրոպական Միութեան անդամ շատ մը երկիրներ, անոնց կարգին՝ Գերմանիան, միակողմանիօրէն որոշեց փակել սահմանները: Մայիսէն սկսեալ, Եւրոպական միութեան եւ Շենկենեան գօտիէն ներս սահմանները աստիճանաբար բացուեցան: Միայն Նորվեկիան եւ Ֆինլանտան մտադիր չեն մինչեւ Յուլիսի կէսը բանալու իրենց սահմանները:
1 Յուլիսէն սկսեալ, Գերմանիան կը նախագահէ Եւրոպական Միութիւնը: Ըստ Մաասի՝ կազմակերպութեան անդամ-պետութիւններու ակնկալիքները, կապուած համավարակին հետ, Գերմանիայէն շատ մեծ են: Գերմանիոյ Արտաքին Գործոց Նախարարութեան ղեկավարը նշած է երեք կարեւորագոյն նպատակներ, ԵՄ-ի տնտեսութիւններուն, մինչեւ 2027 թուական օգնելու բազմամիլիառանոց ծրագիրի վերաբերեալ համաձայնագիրի կնքում, Brexit-ի շուրջ բանակցութիւններ եւ ԵՄ-ի յստակ դիրքորոշում՝ Միացեալ Նահանգներու, Չինաստանի ու Ռուսաստանի հետ մրցակցային յարաբերութիւններուն, յայտնած է DW-ն:
Կ'ակնկալուի, որ Յուլիսին, հանուի ԵՄ մուտքի սահմանափակումները, Հարաւային Քորիայէն եւ Նոր Զելանտիայէն ժամանողներուն համար: Ռուսաստանէն, Միացեալ Նահանգներէն եւ Պրազիլէն ժամանողները մուտքի թոյլտուութիւն կը ստանան բացառիկ պարագաներուն։ Երկիրներու ցուցակը, ուրկէ կարելի կ'ըլլայ անխոչընդոտ մուտք գործել ԵՄ-ի գօտի, վերջնականապէս կը հաստատուի երկուշաբթի օր:
Հետագային, մուտքի արգելման կամ թոյլտուութեան հիմնական գործօնը պիտի ըլլայ վերջին երկու շաբթուայ ընթացքին մեկնման երկրին «Քորոնա» ժահրի վարակի պարագաներու թիւը՝ 100 000 բնակիչի հաշիւով պէտք է ըլլայ 16 կամ աւելի քիչ պարագայ, ինչ որ կը համապատասխանէ ԵՄ-ի միջին ցուցանիշին: Եւ նաեւ կարեւոր նշանակութիւն պիտի ունենայ վարակուածներու թիւին նուազումի միտումը: