Անգարան կը շարունակէ զօրացնել իր ռազմական ներկայութիւնը սուրիական Իտլիպի մէջ՝ նահանգին մէջ իր դիրքերու դէմ իրականացուած յարձակումէն ետք: «Ռիա Նովոսթի»-ի փոխանցմամբ՝ այս մասին յայտնած է «Արդարութիւն եւ զարգացում» իշխող կուսակցութեան մամուլի քարտուղարը:
Անոր խօսքով՝ երկրի նախագահը հրահանգած է հետեւիլ իրադարձութիւններու զարգացման:
«ԹԱՍՍ» գործակալութեան տուեալներով՝ Թուրքիան երկուշաբթի հարուածած է սուրիական կառավարական բանակի դիրքերը՝ խոցելով 115 նպատակակէտ:
Թուրքիոյ պաշտպանութեան նախարարութենէն նշած են, որ հարուածները եղած են ի պատասխան Իտլիպի մէջ իրենց դիտակէտերու ուղղութեամբ իրականացուած հրետակոծութեան:
Պատասխան հարուածներու ժամանակ սուրիական բանակի 101 զինուոր չէզոքացուած է, ինչպէս նաեւ 3 հրասայլ, 2 հրետանային դիրք եւ մէկ ուղղաթիռ: