image

Լիբանանի կառավարութիւնը այսօ՞ր

Լիբանանի  կառավարութիւնը   այսօ՞ր

Բաւական  աղօտ  միջավայրի  մը  մէջ  Պէյրութի  քաղաքական  շրջանակներ   կը   խօսին նոր կառավարութեան  կազմութեան  մեծ հաւանականութեան մասին։

Յիշեցնենք, որ     նշանակեալ  վարչապետ Հասսան Տիապ, որ անցնող  օրերուն   բազմաբեւեռ   հանդիպումներու   ձեռնարկեց,   կարծես   համաձայնեցաւ   այն  առաջարկներուն, որ իր կազմելիք   դահլիճը պէտք է բաղկանայ      20 նախարարներէ։

Յստակ է նաեւ օրեր  առաջ  մէջտեղ  եկած հիմնահարցը,   ըստ  որուն   տիւրզի   համայնքը, ինչպէս նաեւ  քրիստոնեայ  «Ալ Մարատա»   հոսանքի  ղեկավարութիւնը    իրենց  վեթոն    տուած էին   եւ յայտարարած, որ   պիտի  չներգրաւուին  նոր    կազմուելիք  կառավարութեան   մէջ,  կարծես  թէ   վերատեսութեան ենթարկած են իրենց   դիրքորոշումը։

Կը  նշուի  նաեւ, որ «Ալ Մարատա»  հոսանքի ղեկավար       Սուլայման  Ֆրանժիյէ, այսօր հանդէս  պիտի գայ մամլոյ  ասուլիսով՝   վերջնականապէս պարզելու համար իր   մօտեցումները։

 Իր  կարգին   երկրի  խորհրդարանի  նախագահ Նէպիհ Պըրրի,   որ անցնող  ժամերուն       հանդիպում ունեցած  էր վարչապետ Տիապին  հետ,    հանդէս եկած է  բաւականին լաւատեսական,   յայտնելով, որ կառավարութեան կազմութիւնը պիտի    կատարուի այսօր։

Ի   դէպ    սա  առաջին անգամը  չէ, որ    երկրի իշխող     շրջանակներ նման լաւատեսական   մօտեցումներով հանդէս կու գային, սակայն  աւելի ուշ  այդ լաւատեսութիւնը   «ջուրը կ՚իյնար»  շատ  յաճախ   հասկնալի  ու յաճախ  ալ  խորհրդաւոր    պատճառներով։

 

 

   Յիշեցնենք, որ արդէն  երեք ամիսէ որ    Լիբանան  թատերաբեմ  դարձած է   բողոքի  մեծ  ալիքի,  երկրին մէջ  տիրող  տնտեսական    բարդ   վիճակը    ալ  աւելիով դարձնելով անտանելի եւ    անկանխատեսելի։