Լիբանանի վարչապետ Սաատ Հարիրի այսօր կը մեկնի Պրիւքսէլ, մասնակցելու համար սուրիացի փախստականներու խնդիրներուն նուիրուած միջազգային համաժողովի մը:
Նշենք, որ Հարիրիի գլխաւորած պատուիրակութեան մէջ կը բացակայի իր կառավարութեան փախստականներու հարցերով նախարար Սալէհ Ղարիպը, որուն պատճառով ալ երկրին մէջ քաղաքական տագնապի նախանշոյլներ կ'երեւին:
Ըստ շարք մը վերլուծաբաններու, Հարիրիի այս քայլը ցոյց կու տայ, որ ան ամէն գնով կը փորձէ իր ընդդիմադիրներուն ըսել, որ ինքն է իրական տէրը խաղին եւ Սուրիոյ նկատմամբ իր ժխտական կեցուածքը եւ Դամասկոսի հետ ոչ մէկ կերպ յարաբերութիւններ սկսելու համաարաբական որոշումին կառչումը կը մնան այլընտրանք չունեցող որոշումներ:
Տարբեր աղբիւրներ նաեւ կը նշեն, որ այս քայլէն ետք կարեւոր քննարկումներ պիտի կատարուին 8 Մարտ քաղաքական ուժերու թեւին մօտ, որոնք աւելի ուշ պիտի արձագանգեն իրենց համար Հարիրիի այս անընդունելի քայլին: