Լիբանանի նախկին ներքին գործոց եւ ապա արդարադատութեան նախարար Աշրաֆ Ռիֆի ծանր մեղադրանքներ ուղղեց Սաատ Հարիրիին: Այս մասին տեղեկութիւնը հաղորդեց «Շարք Ալ-Աուսաթ» պարբերականը, նշելով, որ Ռիֆի դատապարտեց վարչապետը եւ նկատել տուաւ, որ ան կը գործակցի «Հըզպալլա»ի հետ:
Ռիֆի նաեւ յայտնեց, որ Հարիրի ամէն շրջանի ժողովի կը նստի «Հըզպալլա»ի ներկայացուցիչներուն հտտ եւ ան վարչապետ դարձած է շնորհիւ «Հըզպալլա»ի նեցուկին:
Յիշեցնենք, որ այս յայտարարութիւնները տեղի կ'ունենան այն պահուն, երբ Թրիփոլի քաղաքը, որմէ կը սերի զօրավար Ռիֆին, կը պատրստուի մասնակի երեսփոխանական ընտրութիւններոուն:
«Շարք Ալ-Աուսաթ» թերթը նաեւ կը նշէ, որ շատ հաւանական է, որ Աշրաֆ Ռիֆի ներկայացնէ իր թեկնածութիւնը, այդպիսով դառնալով Հարիրիի պլոքին կողմէ ներկայանալիք թեկնածու Տիմա Ժամալիի գլխաւոր մրցակիցը:
Յիշեցնենք, որ «Ալ-Մուսթաքպալ» պլոքի անդամ եւ Թրիփոլիէն ընտրուած Տիմա Ժամալիի երեսփոխանութիւնը անվաւեր համարուած էր,Լիբանանի ընտրական յանձնաժողովին անոր երեսփոխանութիւնը չեղեալ համարելու վերաբերեալ ներկայացուած յայտէն ետք: