Լիբանանի ներքին գործոց նախկին նախարար եւ ներկայիս «Ինթըրփոլ»ի նախագահ Էլիաս Մըր, զգայացունց յայտարարութեամբ մը հանդէս եկած է:
Յայտարարութիւնը, որ լոյս տեսած է Էլիաս Մըրին մօտիկ համարուող «Ալ-Ժումհուրիա» պարբերականին մէջ, ներկայացուցած է վերջին ամիսներուն նախարարի դիմատետրի հաշիւին յափշտակման ամբողջ պատմութիւնը:
Կը նշուի նաեւ, որ անյայտ օգտատէրեր յատուկ միջոցներ գործադրելով, յաջողած են ստեղծել Էլիաս Մըրի անունով դիմատետրի կեղծ հաշիւ մը, որուն համար ալ «ինթըրփոլ»ի պատասխանատուն դիմած է լիբանանեան պատկան մարմիններուն, որոնք ոչ մէկ հետաքրքրութիւն կամ արձագանգ տուած են իր բողոքներուն:
Յիշեցնենք, որ միջազգային ոստիկանական, ինչպէս նաեւ «Ինթըրփոլ»ի շրջանակներուն մէջ յոյն ուղղափառ համայնքի անդամ Էլիաս Մըր կը համարուի կարեւոր եւ յարգուած անձնաւորութիւն մը:
Էլիաս Մըր իր նիւթի աւարտին դժգոհութիւն յայտնելով լիբանանեան պատկան մարմիններու վերաբերմունքին վերաբերեալ, գրած է. «ցաւօք պետութիւն գոյութիւն չունի»: