Ամանորեայ օրերը ականատես եղան մեծ մարտերու, յատկապէս Հալէպ քաղաքի արեւմտեան հատուածին մէջ: Այս մասին տեղեկութիւնը կը հաղորդէ «Ալ-Ժատիտ» կայանը, նշելով, որ թէժ մարտեր տեղի ունեցած են մէկ կողմէն «Հայըէթ թահրիր Ալ-Շամ» (նախկին անուանումը՝ Ալ-Նուսրա ճակատ) եւ միւս կողմէ Նուր Ալ-Տին Ալ-Զանքի խմբաւորման միջեւ:
Կը հաղորդուի նաեւ, որ Ալ-Նուսրա յաջողած է տիրապետել Նուր ԱԼ-Տին Ալ-Զանքիի տիրապետութեան տակ եղող կարգ մը շրջաններուն վրայ:
Յիշեցնենք, որ Նուր Ալ-Տին Ալ-Զանքի կը համարուի Անգարային մօտիկ եւ անոր հովանիին տակ գործող զինուորական խմբաւորում մը:
Անշուշտ այս դէպքերը տեղի կ'ունենան այն պահուն, երբ Միացեալ Նահանգներ որոշած է դուրս բերել իր ուժերը Սուրիոյ հիւսիսային հատուածներէն: