Թրքական «Ենի Շաֆաք» թերթի խմբագիր Իպրահիմ Գարակիւլ երէկ կարեւոր յայտարարութիւններ կատարած է Խաշըքճիի սպանութեան թղթածրարի վերաբերեալ:
Գարակիւլ յայտարարած է, որ իրենց մօտ գտնուող փաստարկները կրնան վերջ մը դնել Սէուտական Արաբիոյ գահաժառանգ Մուհամմատ Պըն Սըլման իշխանի քաղաքական գործունէութեան:
Ան այս առումով «Թուիթըրեան» գրառում մը կատարած է, նշելով, որ Մուհամմատ Պըն Սըլման մեծ սխալներ կը գործէ շրջանին մէջ, սակայն եթէ Թուրքիա կամենայ, կրնայ վերջ մը դնել իր գործունէութեան:
Գարակիւլ նաեւ ըսած է, որ իր ունեցած տուեալներով Թուրքիոյ պատկան մարմիններ ձայնային հաղորդագրութիւններ ունին, որոնց հիման վրայ կարելի է յստակ կերպով պատկերացում մը կազմել, թէ ինչ պայմաններու տակ, ինչ մեթոտներով եւ որու դրդումով սպաննուեցաւ Խաշըքճին, բան մը, որ անոր կարծիքով վերջնականապէս վերջ կրնայ դնել Մուհամմատ Իշխանի քաղաքական գործունէութեան: