Ամերիկեան «National Interest» ամսագիրը յօդուած մը հրապարակած է, ուր յայտնած է, թէ Սուրիոյ մէջ օդային եւ ծովային ռազմակայաններ ձեռք բերելէն ետք, ներկայիս Ռուսիոյ աչքը Լիբանանի վրայ է:
Յօդուածագիրը որպէս հիմք նկատի ունեցած է Ռուսիոյ վարչապետ Մետվետեւի կողմէ երկրի Պաշտպանութեան նախարարութեան ներկայացուած առաջարկը, որ կը վերաբերի Լիբանանի հետ ռազմական համագործակցութիւն իրականացնելու նպատակով բանակցութիւններ իրականացնելուն:
Համագործակցութեան ծիրին մէջ նախատեսուած է լիբանանեան օդակայաններն ու նաւահանգիստները բանալ ռուսական ռազմական օդանաւերու եւ նաւերու դիմաց, միաժամանակ ռուս ռազմական փորձագէտներ ուղարկել Լիբանան, լիբանանեան բանակի սպաներ վերապատրաստելու, այնուհետեւ ահաբեկչութեան դէմ համատեղ պայքար մղելու համար:
Յօդուածագիրին կարծիքով, Լիբանանի հետ Ռուսիոյ համագործակցութեան հարցը ուշագրաւ պիտի ըլլայ այն առումով, որ ի տարբերութիւն Սուրիոյ, Լիբանան եւ իր բանակը արեւմտամէտ են, իսկ 2008 թուականին Լիբանան մերժած էր «Միկ-29» տիպի 10 կործանիչ ստանալ Ռուսիայէն:
Յօդուածագիրը նաեւ մէջբերած է լիբանանցի վերլուծաբան Թոնի Պատրանի տեսակէտը, թէ Լիբանան այժմ Իսրայէլէն պաշտպանուելու կարիք ունի, իսկ Ռուսիոյ հետ նման համաձայնութիւն կրնայ ԱՄՆ-ի վրայ ճնշում բանեցնելու միջոց ծառայել, եւ ստիպել առաւել մեծ քանակով զէնք տրամադրել Լիբանանին, վերջինս զերծ պահելու համար ԱՄՆ-ի թշնամի Ռուսիոյ հետ համագործակցելէ: