«Սփութնիք» լրատուական կայքը, վկայակոչելով տարբեր լրատուամիջոցներէ ձեռք բերած տեղեկութիւնները, յայտնած է, որ Թրամբ Երուսաղէմը որպէս Իսրայէլի մայրաքաղաք ճանչցաւ այն բանէն ետք, երբ Իսրայէլի հետ գաղտնի գործարք կնքեց:
Աղբիւրը նշած է, որ Թրամբ նախապէս խոստացած էր նախագահական պաշտօնն ստանձնելէ ետք ԱՄՆ դեսպանութիւնը Թէլ Աւիւէն Երուսաղէմ տեղափոխել:
Բացի անկէ, ԱՄՆ եւ Իսրայէլ 2016 թուականի սեպտեմբերին ռազմական համագործակցութեան համաձայնագիր կնքած էին, ըստ որուն ԱՄՆ կը պարտաւորուէր 38 միլիառ տոլարի ռազմական օգնութիւն տրամադրել Իսրայէլին:
Նշուած է նաեւ, որ Թրամբ ներկայիս կը քննարկէ յիշեալ ռազմական օգնութեան չափն աւելցնել, սակայն փոխարէնը Իսրայէլի վարչապետ Նաթանիահուէն կը պահանջէ այնպիսի զիջումներ կատարել, որոնք կը գոհացնեն ԱՄՆ-ի մէջ ռազմամթերքի արտադրութեան ոլորտին մէջ ներդրումներ կատարող մեծահարուստները:
Ըստ փոխանցուած տեղեկութիւններուն, ԱՄՆ նախագահի պայմանն է, որ Իսրայէլ իր զինամթերքի 75 տոկոսը ձեռք բերէ ամերիկեան շուկայէն: