image

Անգլիայում գրասեղանի գաղտնի դարակում հայտնաբերվել է Խրիմյան Հայրիկի ձեռագրով գրված անտիպ բանաստեղծությունը

Անգլիայում գրասեղանի գաղտնի դարակում հայտնաբերվել է Խրիմյան Հայրիկի ձեռագրով գրված անտիպ բանաստեղծությունը

Օրերս Մայր Աթոռ Սուրբ Էջմիածնի «Վաչե և Թամար Մանուկյան» Մատենադարանը հարստացավ բացառիկ արժեք ներկայացնող մի ձեռագրով՝ թանգարանին հանձնվեց հայ կաթողիկոս, մեծ մտավորական և գրող Խրիմյան Հայրիկի ձեռագրով գրված բանաստեղծությունների տետրը:

Տետրը Մայր Աթոռ Սուրբ Էջմիածին է բերել երուսաղեմահայ մտավորական, բանաստեղծուհի Անուշ Նագգաշյանը, որն էլ «Արևելքին» հայտնեց լուրը:  Իր չափածո գործը Խրիմյան Հայրիկը վերնագրել է «Թագավորաց ժողով»: Ըստ Անուշ Նագգաշյանի, դիտարկումներ կան, որ խոսքը վերաբերվում  է Բեռլինի Վեհաժողովին, որտեղ առաջին անգամ միջազգային քննարկման է դրվել Հայկական հարցը: Հայտնի է, որ Կոստանդնուպոլսից Բեռլինի  վեհաժողովին մասնակցում էր ազգային պատվիրակություն՝  Խրիմյան Հայրիկի գլխավորությամբ, որին թույլ չէին տվել մասնակցել  վեհաժողովին:  Խրիմյան Հայրիկը փորձել է այդ դեպքի հետ կապված իր մտածումները ամփոփել բանաստեղծությամբ:  

 


 

Ինչպես մեզ հետ զրույցում նշեց Անուշ Նագգաշյանը, ձեռագիրն իր մոտ է հայտնվել պատահաբար. Անգլիայից Աբրահամ Մնացականյանի դուստրը այն գտել է իր բարեկամների տանը, որոնք էլ իրենց հերթին մոտ 40 տարի առաջ մի հայի տուն են վարձել: Վարձակալները գնել են տան սեղանը, որը գաղտնի դարակ է ունեցել: Հենց այդ դարակում էլ ընդամենը վերջերս հայտնաբերվել է տետրը, որի հետ նաև՝ Խրիմյան Հայրիկի լուսանկարն ու հայ որբերի լուսանկարներ:

 


 

Անուշ Նագգաշյանը նշեց, որ այն, ստանալով Աբրահամ Մնացականյանից, շտապել  է Հայաստան՝ Մայր Աթոռ Սուրբ Էջմիածին և անձամբ Ամենայն Հայոց կաթողիկոսին հանձնել թանկարժեք  ձեռագիրը, որը, ըստ բանաստեղծուհու, հայոց գանձարանի նմուշ է  և որի տեղը միայն Հայաստանն է:

Բանաստեղծուհին հայտնեց նաև, որ ձեռագիր-տետրը շուտով կտպագրվի՝ հատուկ ծանոթագրությամբ: 

 


Անուշ Նագգաշյանը