12.09c
Երեվան
ուրբ, ապր 19
Հայաստանի ֆութպոլի ֆետերացիայի նախագահ Արթուր Վանեցեանը հրաժարական տուած է։ Այս մասին Վանեցեանը յայտարարած է գործադիր կոմիտէ հերթական նիստէն ետք լրագրողներու հետ զրոյցի ժամանակ։
Ըստ անոր, թեման Հայաստանի ֆութպոլի շուրջ վերջին իրադարձութիւններն էին։ Ան յիշեցուցած է, որ Հայաստանի հաւաքականը 1։9 հաշուով պարտութիւն կրած էր Իտալիոյ հաւաքականէն. - «Քննարկման արդիւնքում ես՝ որպէս Հայաստանի ֆութպոլի ֆետերացիայի նախագահ, առաջարկեցի եւ յայտարարեցի գործադիր կոմիտէ անդամներին, որ ընդունեն իմ հրաժարականի դիմումը։ Գործկումում ունեցանք երկար քննարկում», - ըսած է Վանեցեանը։
ԱԺ «Իմ քայլը» խմբակցութեան պատգամաւոր, գործադիր կոմիտէ անդամ Ռուբէն Ռուբինեանն ըսած է, որ այդ հրաժարականը ընդունած են, Վանեցեանին շնորհակալութիւն յայտնած են համատեղ աշխատանքի համար։ Ռուբինեանը նշած է, որ եկած են եզրայանգման, որ Վանեցեանի հրաժարականէն ետք 23 դեկտեմբերին պիտի հրաւիրուի ժողով, որուն ժամանակ պիտի ընտրուի ՀՖՖ նախագահ եւ գործադիր կոմիտէ։
Յիշեցնենք, որ Հայաստանի ազգային հաւաքականը «Եւրօ-2020»-ի ընտրական մրցաշարը աւարտեց 10 միաւորով՝ զբաղցնելով J խումբի նախավերջին հորիզոնականը: Եւրոպայի առաջնութեան եզրափակիչ դուրս գալու հնարաւորութիւնը Հայաստանը կորսնցուցած էր դեռ նախորդ տուրին:
Նորանշանակ գլխաւոր մարզիչ Աբրահամ Խաշմանեանը դաշտին մէջ կատարուածն իսկական «ֆիասքօ» (անյաջողութիւն) որակած էր։
