21.09c
Երեվան
երք, ապր 16
ՀՅԴ Հայաստանի Գերագոյն մարմինը 21 Օգոստոսին հրապարակեց հետեւեալ հաղորդագրութիւնը, որուն մէջ կ՛անդրադառնայ վերջին օրերուն յատկապէս Հայաստանի պետական թէ հասարակական շրջանակներուն կողմէ լուսարձակի տակ առնուած Ամուլսարի հարցին.
«Ամուլսարի շահագործման առնչութեամբ վերջին օրերին ծաւալուող հանրային լարուածութեան պատճառը գործող իշխանութիւնների հակասական յայտարարութիւններն են, չկշռադատուած գործողութիւնները, ինչպէս նաեւ խնդրի շուրջ հասարակութեան լայն շրջանակներում ձեւաւորուած մեծ սպասումներին համարժէք քայլերի բացակայութիւնը։
Առաջնահերթութիւն համարելով ազգային եւ պետական շահը, հանրային համերաշխութիւնը, բնական պաշարների անվտանգ շահագործումը, շրջակայ միջավայրի կենսաբազմազանութեան պահպանումն ու երկրի կայուն զարգացումը՝
– ՀՅԴ Հայաստանի Գերագոյն մարմինը խիստ մտահոգիչ է համարում այն իրողութիւնը, որ հրապարակուած եզրակացութիւնները բաւարար համոզում եւ վստահութիւն չեն ներշնչում ինչպէս հանրային, այնպէս էլ մասնագիտական շրջանակներում.
– Իշխանութիւններին կոչ ենք անում հրապարակուած մասնագիտական եզրակացութիւնը չդիտարկել որպէս հանքի շահագործման վերջնական հիմնաւորում.
– Կարեւորելով խնդրի հանրային հնչեղութիւնը, երկրի սոցիալ-տնտեսական եւ բնապահպանական հեռանկարի վրայ վերջինիս հնարաւոր լրջագոյն ազդեցութիւնն ու ռիսկերը (վտանգները-Խմբ.), նպատակայարմար ենք գտնում՝
– Հանրային եւ մասնագիտական լրացուցիչ քննարկումների արդիւնքում հասնել համոզիչ լուծումների.
– վերականգնել առողջ երկխօսութիւնը մասնագիտական փորձագիտական շրջանակների հետ, հանրաքուէի ճանապարհով հասնել պետութեան շահերից բխող եւ հանրութեան կողմից ընդունելի որոշման»։
