Ջերմուկի մէջ, ի պաշտպանութիւն Ամուլսարի, բողոքի հաւաք ու երթ տեղի ունեցած են: Այս մասին կը տեղեկացնէ «Հայկական բնապահպանական ճակատ» քաղաքացիական նախաձեռնութիւնը:
Հաւաքուած ժողովուրդը ուղիղ եթերի ժամանակ յայտարարած է, որ Քննչական կոմիտէի մամուլի ասուլիսէն յետոյ, բնակչութեան մէջ անորոշ վիճակ եւ լարուածութիւն առաջացած է: Բոլորը պահանջած են մարզպետի հետ հանդիպում:
Յիշեցնենք, որ Քննչական կոմիտէն հրապարակած է Ամուլսարի ոսկեբեր հանքավայրի շահագործման հետ կապուած փորձաքննութեան արդիւնքները, որոնք կատարուած են Advanced Resources Development (ELARD) ընկերութեան կողմէ: Այդ արդիւնքներու համաձայն նշուած են 16 կէտ, որոնց պահպանմամբ, բնապահպանական վտանգները կը դառնան կառավարելի:
«Ջերմուկ քաղաքի բնակչութիւնն ու ամբողջ խելամիտ հայութիւնը Ամուլսարի հարցով իր որոշումը կայացուցած է, ու որեւէ փորձաքննութիւն չազդեր մեր որոշման վրայ: Մեր որոշումը անփոփոխ է, Ամուլսարը սար կը մնայ»,- յայտարարած է Ջերմուկի բնակիչներէն Շիրակ Պունիաթեանը:
Ըստ բողոքի մասնակիցներուն՝ փորձաքննութիւն կատարող ընկերութիւնը լիբանանեան է, ոսկիի հանքերու հետ աշխատելու փորձ չունի: