Ծաղկաձորի մէջ 12 Օգոստոսին սկսաւ Սփիւռքի գործերու գլխաւոր յանձնակատարի գրասենեակի «Քայլ դէպի տուն» ծրագրի 2-րդ հանգրուանը: Այս անգամ 28 երկիրներէ Հայաստան ժամանած են շուրջ 190 սփիւռքահայ պատանիներ, մինչեւ իսկ Թայլանտէն, Մոնթենեկրոյէն, Քաթարէն ու Պրազիլէն:
Ողջունելով մասնակիցներուն՝ Զարեհ Սինանեանը նշած է.
«Բարի եկած էք ձեր տուն: Այս 2 շաբաթներու ընթացքին պիտի այցելէք Հայաստանի տեսարժան վայրերը, բացայայտէք հայրենիքը, սակայն ամենակարեւորը, որ դուք ընկերական կապեր պիտի հաստատէք, եւ հարստանաք նոր ընկերներով, նոր սիրով պիտի լեցուիք Հայաստանի հանդէպ»:
Ապա պատանիները ներկայացուցած են իրենց ակնկալիքները. անոնցմէ մաս մը ցանկացած է աւելի լաւ ճանչնալ հայրենիքը, միւս մասը՝ ընկերներ ունենալ ամբողջ աշխարհէն, միւսները՝ պարզապէս ամրապնդել իրենց գիտելիքները: Ճամբարային 14 օրերու ընթացքին մասնակիցները բացի հայոց լեզուի դասընթացքներէն, պիտի այցելեն նաեւ Հայաստանի կրթական ու նորարարական կեդրոնները, պիտի մասնակցին հետաքրքիր հանդիպումներու, մշակութային ու մարզական միջոցառումներու:
Յիշեցնենք, որ ծրագրի առաջին հանգրուանին մասնակցած էին 200 մասնակից 30 երկիրներէ: