Շուրջ 38 քմ երկարութեամբ սահմանագիծ ունեցող Կոթիի մէջ լուծուած է փողոցներու արտաքին լուսաւորութեան խնդիրը: Այս մասին կը հաղորդէ «Արցախբրես»ը:
Գործընկեր կառոյցներու՝ ՎիվաՍել-ՄԹՍ-ի եւ Վայրի բնութեան եւ մշակութային արժէքներու պահպանման հիմնադրամի (FPWC) համատեղ ջանքներով լուսաւորուած է հակառակորդի նշանառութեան տակ պարբերաբար յայտնուող ամբողջ թաղամաս մը` շուրջ 1600 մեթր երկարութեամբ տարածութիւն: Տեղակայուած է 42 LED լուսարձակ: Ստեղծուած է արտաքին լուսաւորութեան ջերմուժ խնայող եւ ամբողջութեամբ նոր ենթակառուցուածք՝ «Այլընտրանքային ուժանիւթ» նախագիծի շրջագիծէն ներս։
ՎիվաՍել-ՄԹՍ-էն յայտնած են, որ ծրագրի իրականացնումը կարեւոր էր սահմանապահ գիւղի բնակիչներու անվտանգութեան համար. Կոթին պարբերաբար թիրախաւորուած է հակառակորդի կողմէ: Բնակիչներու յիշողութեան մէջ դեռ թարմ է վերջին՝ 2018-ի սեպտեմբերին տեղի ունեցած գնդակոծութիւնը, որու հետեւանքով վիրաւորուած էր համագիւղացիներէն մէկը: Լուսաւորուած թաղամասը իւրօրինակ ուղերձ է հակառակորդին. գիւղը կ'ապրի եւ պիտի շարունակէ զարգանալ:
Ծրագրի շրջածիրէն ներս գործակցող կողմերու համար կարեւորագոյն առաջնահերթութիւն է համայնքային զարգացումը: Իսկ բնապահպանական եւ ջերմուժ խնայող LED լուսարձակներու շահագործումը արդիւնաւէտ՝ տնտեսապէս: