24.09c
Երեվան
ուրբ, ապր 19
Այսօր Յիսուս Քրիստոսի պայծառակերպութեան տօնն է, որ Հայ Եկեղեցւոյ հինգ տաղաւար տօներէն երրորդն է: «Մեր Տէր Յիսուս Քրիստոս, համաձայն Աւետարանի, Ս. Պետրոս, Ս. Յակոբոս եւ Ս. Յովհաննէս առաքեալներու հետ կը բարձրանայ Թաբոր լեռը`աղօթելու: Աղօթքի պահին Յիսուս անոնց առաջեւ կը պայծառակերպուի։
Ըստ qahana.am-ի՝ Յիսուսի պայծառակերպութեան ժամանակ Մովսէսի` նախանձայոյզ օրէնսդրի ու Եղիայի` երկինք տեղափոխուած նախանձախնդիր օրինապահի յայտնուիլը կը խորհրդանշէ, որ Քրիստոս է Օրէնսդիրը եւ չի դրժեր Աստուծոյ Ուխտը: Ան է Տէրը երկրի եւ երկինքի, ողջերու ու մեռեալներու, քանզի Մովսէսին մեռելներու մէջէն վեր հանեց, իսկ Եղիային`ողջերուն:
Այս տօնը յայտնի է նաեւ Վարդավառ անունով: Տօնի ժամանակ ժողովրդական սովորոյթներէն է իրար վրայ ջուր ցօղելն ու աղաւնիներ թռցնելը, որոնք կը խորհրդանշեն ջրհեղեղը, Նոյի ընտանիքի փրկութիւնը, Նոյի աղաւնին: Սովորութիւն է նաեւ ծաղիկներով զարդարուիլը, ինչը Աստուածորդու փառքի երեւման առթիւ մեծ ուրախութեան արտայայտութիւն է:
«Վարդավառ» ժողովրդական անուանումը, հաւանաբար, կու գայ վարդաջուր լեցնելու սովորութենէն:
Ս. Գրիգոր Տաթեւացին տօնի «Վարդավառ» անունը կը բացատրէ Յիսուսին վարդի հետ համեմատելով. ինչպէս վարդը մինչեւ բացուիլը թաքնուած է իր պատեանի մէջ եւ բացուելով` կ'երեւայ բոլորին, այնպէս ալ Յիսուս մինչեւ այլակերպութիւնը Իր մէջ կը կրէր աստուածային էութիւնը եւ պայծառակերպուելով` յայտնեց իր Աստուածութիւնը:
Վարդավառի տօնին կը նախորդէ շաբաթապահք: Իսկ յաջորդ օրը, ինչպէս տաղաւար բոլոր տօներէն ետք, Մեռելոց է. բոլոր եկեղեցիներուն մէջ ննջեցեալներու հոգիներուն համար կը մատուցուի Ս. Պատարագ եւ կը կատարուի հոգեհանգիստ:
Նշենք, որ երկուշաբթի օր աշխատանքային է, քանի որ Կառավարութիւնը որոշում չէ կայացուցած այն ոչ աշխատանքային դարձնելու վերաբերեալ։
