image

ԱԺ-ի պատգամաւորներու յաջողութիւնը մեծապէս պայմանաւորուած է ՀՀ իւրաքանչիւր քաղաքացիի աջակցութենէն. ՀՀ Նախագահը մասնակցեցաւ նոր ԱԺ-ի առաջին նիստին

ԱԺ-ի պատգամաւորներու յաջողութիւնը մեծապէս պայմանաւորուած է ՀՀ իւրաքանչիւր քաղաքացիի աջակցութենէն. ՀՀ Նախագահը մասնակցեցաւ նոր ԱԺ-ի առաջին նիստին

7-րդ գումարման Ազգային ժողովի պատգամաւորներու յաջողութիւնը մեծապէս պայմանաւորուած է ՀՀ իւրաքանչիւր քաղաքացիի աջակցութենէն: «Արմէնբրես»-ի փոխանցմամբ՝ այս մասին 14 յունուարին ՀՀ 7-րդ գումարման Ազգային ժողովի առաջին նիստի ընթացքին յայտնած է ՀՀ նախագահ Արմէն Սարգսեանը:

«Պատմութիւն դարձած 2018թ.-ը մեծ փոփոխութիւնների, փորձութիւնների, սպասումների եւ յոյսերի տարի էր: Մեր ժողովրդի լաւագոյն յատկանիշների՝ միասնականութեան, համախմբուածութեան, բարձր բարոյական եւ քաղաքական, քաղաքական հոգու բազմաթիւ դրսեւորումների տարի էր: Դեկտեմբերի 9-ի խորհրդարանական ընտրութիւնների արդիւնքները, որոնք ճանաչուել են մասնակցած բոլոր քաղաքական ուժերի ու միջազգային դիտորդների կողմից, բարձր լեկիթիմութեամբ են օժտել ներկայ Ազգային ժողովին: Նոր Ազգային ժողովի եւ նոր կառավարութեան ձեւաւորմամբ աւարտւում է քաղաքական փոփոխութիւնների առաջին փուլը: Սկսում է յաջորդ՝ յոյսերի եւ խոստումների արդարացման, հետեւողական, յամառ եւ ամենօրեայ աշխատանքի փուլը: Դուք ստացել էք լայն հնարաւորութիւններ՝ կեանքի կոչելու թաւշեայ յեղափոխութեան գաղափարները եւ արդարացնելու հասարակութեան սպասելիքները՝ կերտելու նոր Հայաստան: Ձեր գործունէութեան յաջողութիւնը մեծապէս պայմանաւորուած է լինելու Հայաստանի քաղաքացու աջակցութիւնից, եւ նրա մասնակցութիւնից հասարակական, քաղաքական, տնտեսական, կրթական եւ մշակութային կեանքին»,- ըսած է նախագահը:

Արմէն Սարգսեան իր ելոյթին մէջ մատնանշած է այն առաջնահերթ խնդիրները, որոնք ծառացած են Ազգային ժողովի եւ պետական մարմիններու առաջ:

«Սահմանադրութեան առաջին յօդուածը հռչակում է՝ Հայաստանի Հանրապետութիւնը ինքնիշխան, ժողովրդավարական, սոցիալական եւ իրաւական պետութիւն: Այդ դրոյթը ոչ թէ փաստի արձանագրում է, այլ պետութեան համար կարեւորագոյն սկզբունք, նպատակ: Նպատակ, որը երբեք չի կարելի համարել լիարժէքօրէն իրականացուած: Նպատակ, որին պէտք է ձգտել մշտապէս կատարելագործելով ու անցնելով երկար ճանապարհ: Այսպիսով՝ նոր Հայաստան կառուցելու համար դեռ բազում եւ լուրջ բարեփոխումներ պէտք է իրականացուեն բոլոր բնագաւառներում: Առաջնային հարց է մնում ՀՀ-ում բնակուող իւրաքանչիւր անձի բարեկեցիկ եւ արժանավայել կեանքի երաշխաւորումը: Ներկայումս թէ իրաւական հարթութեան վրայ, թէ գործնականում այդ իրաւունքներին բաւարար կարեւորութիւն տրուած չէ: Նոր Հայաստանում մարդու տնտեսական, սոցիալական, մշակութային, կրթական իրաւունքներն ու ազատութիւնները պէտք է հանդիսանան մարդու արժանապատւութեան բաղկացուցիչ կարեւորագոյն մասը: Հենց այդ ընկալումը պէտք է ընկած լինի իրաւական աքթերի եւ պետական մարմինների գործողութիւնների հիմքում»,- նշած է Արմէն Սարգսեանը:

ՀՀ նախագահը նոր Ազգային ժողովին մաղթեց արդիւնաւէտ եւ բեղմնաւոր աշխատանք: