Հայկական նոր թղթադրամները շրջանառութեան մէջ պիտի դրուին 2018 թուականի նոյեմբեր ամսուան վերջը: Այս մասին PanARMENIAN.Net -ի հետ զրոյցի ժամանակ յայտնած է ՀՀ Կեդրոնական դրամատան մամլոյ խօսնակ Յարութիւն Կբեյեանը՝ միեւնոյն ժամանակ ընդգծելով, որ հին թղթադրամները պիտի շարունակեն մնալ շրջանառութեան մէջ:
Ըստ Կբեյեանի, թղթադրամներու՝ պաշտօնապէս շրջանառութեան մէջ դրուելու օրը պիտի յստակեցուի Կեդրոնական դրամատամ յառաջիկայ խորհուրդի նիստերէն մէկուն ընթացքին:
2017 թուականի նոյեմբերին ՀՀ Կեդրոնական դրամատունը ներկայացուցած է շրջանառութեան մէջ ներդրուելիք երրորդ սերունդի թղթադրամներու էսքիզները։
Նոր 1000-դրամանոցը նուիրուած պիտի ըլլայ Պարոյր Սեւակին: 2000-դրամանոցը՝ ճատրակի վարպետ Տիգրան Պետրոսեանին: 5000-դրամանոցը՝ Ուիլիամ Սարոյեանին, 10,000-դրամանոցը՝ Կոմիտասին, 20,000-դրամանոցը՝ Յովհաննէս Այվազովսկիին, 50,000-դրամանոցը՝ Գրիգոր Լուսաւորիչին: 100,000-դրամանոցներ այլեւս պիտի չթողարկուին: