ՀՀ նախագահ Արմէն Սարգսեան ուղերձ յղած է Յաղթանակի եւ խաղաղութեան տօնին առիթով:
ՀՀ նախագահի պաշտօնական կայքին տեղեկութիւններով՝ ուղերձին մէջ կը նշուի.
«Սիրելի հայրենակիցներ,
Կը շնորհաւորեմ Յաղթանակի եւ խաղաղութեան տօնին ու Շուշիի ազատագրման օրուան առիթով:
Այս պահուն ես յատկապէս կը մտածեմ Երկրորդ աշխարհամարտի փառապանծ վեթերաններուն մասին, անոնց՝ որոնք, ի ուրախութիւն բոլորիս, այսօր մեր շարքերուն մէջ են, եւ որոնց կը մաղթեմ քաջառողջութիւն եւ երկար տարիներու կեանք:
Անոնք մեզի կը փոխանցեն պայքարի ոգին եւ յաղթանակի բերկրանքը:
Կը մտածեն նաեւ բոլոր անոնց մասին՝ մեր ծնողներու եւ պապերու, որոնք իրենց ուսերուն վրայ կրեցին պատերազմի դաժանութիւններն ու ծանրութիւնները. սով, գերութիւն, համակեդրոնացման ճամբարներ ու կուլակ, որբութիւն ու անապաստանութիւն: Անոնք մեզի սորվեցուցին տոկալ, յուսալ եւ վերապրիլ:
Գլուխ կը խոնարհեմ այն հազարաւոր հերոսներու յիշատակին առջեւ, որոնք իրենց կեանքը նուիրեցին ազատութեան: Ցեղասպանութենէն դեռ արնածոր հայ ժողովուրդը մեծ գին վճարեց ֆաշիզմի դէմ պայքարին, որուն զաւակները իրենց փառքով պսակեցին բոլոր ճակատներուն վրայ:
Այդ հերոսներուն օրինակով դաստիարակուած են բազմաթիւ սերունդներ: Այդ հերոսներուն ժառանգներն էին, որոնք տասնամեակներ անց յանուն ազատութեան մարտի ելան եւ ազատագրեցին Շուշին՝ կերտելով մեր նորօրեայ յաղթանակները:
Քաջութեան, հերոսութեան եւ յանուն Հայրենիքի ինքնազոհութեան այդ ոգին այսօր ամուր նստած է Հայրենիքի պաշտպանի՝ հայ զինուորի մէջ: Այդ ան էր՝ յաղթական զինուորը, որ 2016-ի Ապրիլին անօրինակ սխրանքով պաշտպանեց հող հայրենին:
Եւ այսօր մեր պայծառ պատանիներն ու երիտասարդները կանգնած են հերթափոխի, ստեղծարար եռանդով, նպատակասլացութեամբ եւ հայրենասիրութեամբ լծուած Հայրենիքի վերաշինման գործին:
Փառք ու պատիւ բոլոր քաջերուն եւ յաւէրժ յիշատակ յանուն Հայրենիքի ընկածներուն»: